何俊仁前兩日講嘅辭職公投，又俾人鬧到飛起。的而且確，大家都要唔知表決咗先嚟公投有乜意義。
社民連劉偉忠(大家先唔好以黨取人，做個有獨立思考嘅人，睇埋先) 尋日提出咗個棄超區公投，而用區議會選舉做一個公投嘅平台，其實係幾值得討論嘅。
AV 仁嘅超區公投其實有唔少問題嘅，我諗呢兩日大家都講咗好多㗎啦，我都廢事浪費大家嘅時間睇我又重申一次。不如直接講區議會公投有乜好處啦。
1. 為泛民支持者投票提供誘因
區議員一直俾大家嘅感覺就係廢，我諗有九成嘅香港人根本從來都無同區議員有過任何交流。呢個係區議會投票一直偏低嘅最基本原因。你有無投過區議員？你知唔知自己果區嘅區議員叫乜名？佢又做過啲乜呢？
區議員係廢嘅，我連投都廢事。呢個就係我普遍聽返嚟嘅感覺。既然係咁廢，我哋點解唔因利成便用區選嚟做公投平台？反正區議員都係花瓶，實權又無乜，除咗掛成功爭取banner，放埋自己個樣上去影響市容之外，根本乜都做唔到。
但你用區會做公投又唔同講法，起碼大家多咗個原因去投。而且投票係有意義嘅，雖然政府好大可能最後都係唔會理你，但個結果的的確確係會出咗一班區議員。如果大家支持果個公投，你哋就會選出咗一個支持呢個議題嘅區議員，而得返嚟嘅資源亦都可以延續返成件事。相反，如果大家真係唔支持嘅，選咗個建制出嚟都係理所當然。
2. 令泛民支持者團結
其實我睇到好多鬧嚟鬧去係非常心痛嘅。大家嘅目標其實係一致嘅(跟住可能又有人會話"我同民主黨目標唔一致，佢哋係賣香港嘅"，唉.. 我唔想再討論邊個係鬼嘅問題。我嘅睇法係如果我係強勢嘅話，民主黨都要跟住我走！點樣可以做得強勢？講啲有建設性嘅嘢﹐做啲有建設性嘅事。全香港人都buy 你果套，咁邊個可以騎劫你？邊個可以出賣你？)，咁就唔好再為啲無謂問題模糊焦點。民主黨係PK，雖然我係熱血公民，但我都投佢，因為我知道另一個區有另一個民主黨人會投熱血公民嘅候選人。呢個先係單議席單票制嘅玩法，呢個先係弱勢下嘅玩法。(我之後會講詳細嘅操作)
3. 推政治新星
雖然係公投，但都有空間俾大家打吓本區工作嘅。泛民一直為人所垢病嘅就係選嚟選去都係果啲人。依家有四百幾人出嚟，話唔定有啲好突出嘅彈咗出嚟都未頂。呢個方案嘅好處係無論你係政黨新人又好，係獨立又好，你都有空間去用自己嘅實力去打呢一場選戰。好多時市民係見到無希望所以唔投票，但係公投嘅議題之下，其實每一區都有機會贏！
仲有另一個大家好需要注意嘅嘢就係關於下年嘅立法會選舉。到時好可能有大量嘅現任議員因為坐監而無資格參選。所以我哋其實好需要係呢一刻就磨練一班新人去參與政治。
4. 慳錢
呢個係比較奇怪嘅講法，但的確搞區選係比搞辭職公投比較慳錢嘅。因為區選係咪都要搞。咁同時亦都可以叫一啲窮得只有錢、認為政府嘅錢比自己嘅自由更重要嘅人收聲。
仲有好處多籮籮，我留個空間俾大家自己思考一下。依家講具體操作。
1. 四百幾個區，每個區都選，每個區都只派一人。呢個要協調機制運作，而且唔可以由政黨帶頭，因為唔好講你，我都唔信佢哋。我會建議搵雙學，而且要公開運作同決定理據。你可能會話"車，雙學咪又係左膠"，不過無法，呢個係我哋要面對嘅政治現實，就係依家只有雙學仲係得到最多人信任，咁我哋唯一可以做嘅就係監察佢。不過，當然要佢哋肯啦。
如果有啲人係堅持要出選某一區而唔入我哋嘅協調機制嘅，當然你係有權出嚟選啦，但機制亦都會寫到明邊個係支持公投嘅，咁自己衡量一下贏唔贏到。
2. 選區分配呢個係最重要嘅問題。要絕對公平下劉偉忠建議全random，之後參選人可以自己同人調，雙方同意下換返自己心水果區。但我就心痛有啲真係做咗四年地區工作嘅候選人，所以就覺得不如有做地區工作兩年以上又或者上屆有選過嘅人可以優先揀自己果區，淨低先random 抽。其實方法可以討論，但大前題係任何人都可以參與，無論你係民主黨、公民黨、社民連、其他政黨、高登仔、熱血公民、陳雲教徒都好，只要你承認呢個大聯盟，你承認公投內容，都可以參與。
3. 公投內容
唔好意思到呢度先講個最重要嘅嘢﹐希望大家唔好too long don't read。公投內容唔係反對831 決定，因為立法會已經否決咗，而係689 下台。689 要為政改失敗而下台，689 要為搞到香港烏煙瘴氣而下台，689 要為製造香港社會撕裂而下台。我有諗過重啟政改做題目，但諗諗吓689 下台先係更為合理。689 下台我相信係香港人共同願望，而且要令公投唔好太虛，我哋係需要一個有確切意義嘅目標，而唔係一個就算成功都好大機會無用嘅重啟政改。如果我哋真係做到個勢會影響區選結果嘅話，結果甚至會係大陸避免泛民反佔區議會而迫689 提早下台！
4. 錢
講錢失感情，但選舉就係要錢。今時今日我對香港人絕對有信心，睇吓籌到幾多，就平均分俾每一個候選人，淨返嘅就唯有自己諗辦法。
我相信其實仲有好多爭議嘅，包括對政黨嘅偏坦，社區工作嘅重要，超過四百人嘅安排等等。依家只係初稿，仲希望大家可以有多啲嘅討論。但我哋要係心態上轉變，先可以奪回香港嘅未來。