小市民好政經：搞乜鬼學校資助？
文：圓師奶X長看更
長：早晨呀圓師奶！喂，有無睇今朝報紙呀, 教育局揼錢搞多啲中港學生交流團喎！
圓：係？個女成日話想去旅行，試下拖喼仔出去玩，學校有機會俾佢都好嘅。睇下先… 「校長代表期望每年撥款二十萬元俾學校結盟，目標係六百間中小學，每年約需一億二千萬元開支… 」哇… 有無啲實在啲嘅數字呀？
長：話想同學「驚嘆內地樓宇建築咁高，酒店甚具水平，學校面積又大」喎。俾咁多錢，俾啲同學返內地睇樓睇酒店睇學校，嘥左啲咁喎......圓：你咁講又係...
長：嗱，你話喇，一億咁多錢，可以買到咩？起到幾多公屋？幾多個託兒中心？到底用係返大陸睇樓，係唔係真係抵先？
圓：係囉...... 咦，佢仲話，(刪) 目標只係得六百間中小學，全港中小學有幾多間呢？佢唔講，都唔知有無我個女份添…
長：計我話，其實洗咁多公家錢，政府作為人民公僕，方向報作為媒體公器，其實係責任幫小市民問清楚，政府啲錢用黎為咩，用得值唔值先得架！圓：咪係！諗番轉頭，好心教育局有咁多錢，不如搞好啲升學出路啦。一方面揼錢搞交流睇大樓，另一方面又任由啲咩高中應用課程加學費。最緊要確保我個女讀完書有地方揾食嘛！唔好搞到人肯做都無得做啦！ 唉，個女仲細，都唔擔心得咁多住。隔離屋個師奶個仔今年就考大學，真係戳佢擔心，過去搵佢傾下先。