文：深水師奶
身為深水埗街坊，都唔想開名鬧街坊店舖，但最近真係忍無可忍， 覺得應該講出來等大家評評理，諗下以後仲要唔要幫襯欺人太甚的連鎖店。
話說本區有馳名的豆腐老舖【公和】，雖說工作人員有時惡惡地，而且左右得一間賣豆腐，但問心，吃【公和】十年，其品質真係維持水準，價錢又適宜。所以，除了區外聞名而至的食客之外，都有好多本區街坊幫襯，所以買餸時間、放學放工時間都多人。
近一個月，【公和】旁邊來了一間連鎖店，名叫【豆腐主義】(荃灣、將軍澳、元朗、深水埗都有分店)。本來，有平野買，作為街坊，係會開心；本來，差不多的店舖，成行成市，街坊有得揀，係無問題的。但係…
以本傷人
這間【豆腐主義】一來到，就以本傷人，做到大部份貨品以低價出售了一個月，而且，日日叫個職員開到擴音器好大好大聲地叫賣，語氣甚為嚣張，擺明想做低旁邊的老字號【公和】。深水埗那麼多基層街坊，有得平都會幫襯，可以理解。同時，有個真人職員一路叫賣，效果的確比錄音機好好多。所以，【豆腐主義】這個搶生意的計劃，十分成功，好多人買。
出言侮辱
本來，我都沒有想說公開點名罵人，但早幾日經過，聽到【豆腐主義】開咪叫賣的內容，已經不單純是叫賣，而是加入了許多侮辱【公和】及其客人的語句，例如說繼續幫襯【公和】而不幫襯他們的人，都是「鄉下人」(仲侮辱埋農夫和鄉郊朋友添！)，更暗示【公和】的食物品質不好！（見：影片 http://youtu.be/KO24ZjMXBSM）
哇大佬，洗唔洗講到咁呀，都俾你搶左好多生意啦，仲咁侮辱人！
我係到食左十年，都唔覺【公和】質素唔好！
反壟斷，對所有人都有益
問題是，如果一間連鎖店做低了小品經營的老舖，無了競爭對手，我不信它不加價，我就不信它不會變成質素奇差！
為何舊區有些獨市生意老店，質素不下降？這就是人品的問題。我自己和不少老店傾偈，買他們的產品，都會發現他們把自己的尊嚴，建立在自己的工作是否盡力盡善，而不建立在盡賺之上。可是，連鎖店嘛，大家就別夢想了。我也見過幾間老店在深水埗發跡，然後開到全香港，之後質素下降，價格上升。
各位朋友，日後見到這間作風可惡的【豆腐主義】，呼籲大家不要幫襯！！
［草根.行動.媒體]http://grassmediaction.wordpress.com