立即捐款

體育

金球獎比香港樂壇頒獎禮更垃圾

金球獎比香港樂壇頒獎禮更垃圾
廣告

廣告

金球獎自2010由法國足球雜誌同FIFA世足合併後,得獎結果可以話係垃圾圾。2010年以前係由各體育傳媒投票,體育傳媒平時工作會對各大賽事分析同報導,對賽事既理解必然會更全面同深入;相反,2010年起改由國家隊領隊同隊長投票,往往只會出現人氣王霸佔前列位置,你唔好指望非洲、亞洲小國既領隊同隊長會睇好多比賽、更唔好講佢地會對各項賽事有深入理解。所以,自2010年起,C朗、美斯,無論當季表現係點,無論球會或國家隊有冇成績,無論當年有冇其他球員表現特別好,呢兩位人氣王必然入三甲。

舊制下既金球獎,你會見到有尼維特、舒夫真高、奧雲、簡拿華路、卡卡出現係得獎名單之上。呢幾位球員都有共通點,就係技術上佢地絕對唔係當時頂尖果類(同期有施丹、費高、3R),個人入球數據亦唔係當年最好(講入球數字當年一定係軒歷拿臣、查度、科蘭),個人名氣更加唔算得上係劃時代既人物(果期人氣王一定係皇馬六條煙)。不過,佢地同樣都係各自球會或國家隊既靈魂人物,對球隊有絕對影響力,而且當年亦帶領球隊爭取到好成績。正係因為體育傳媒對比賽既理解夠廣泛同深入,呢d球員先會得獎。如果將新制放係當年,奧雲、尼維特、奧簡拿華路係肯定冇獎兼三甲不入,因為奧雲只係一個技術特點好單一既前鋒,尼維特天生唔係果種擁有華麗技術既球王級球員,簡拿華路更加係一名中堅,點同其他球星鬥名氣?

但2001年既奧雲你話佢廢又好話佢早熟早殘又好,就係憑一招無敵既快放反越位,帶領利物浦贏哂當年佢地參與既所有杯賽;2003年既尼維特憑住充滿球咪既拼勁成功填補施丹離開既空缺,帶領祖雲達斯橫掃意甲、歐聯決賽互射12碼僅負米蘭;而簡拿華路係2006年世界杯一夫當關,7場賽事成功封殺各隊攻擊球員(當屆賽事冇一隊波可以由運動戰射入意大利,意大利僅失過一球烏龍同一球12碼),表演各類高難度解圍同攔截,帶領國家隊奪冠。正因為佢地本身個人表現出色(唔係單憑個人入球數據),亦帶領到球隊拎好成績,傳媒先會投佢地票。

睇返2010年改制後第一屆選舉,當年史尼達憑住一招手術刀傳球同左右開弓火陷射球,帶領國際米蘭勇奪三冠(意甲、意杯、歐聯),荷蘭國家隊亦一路殺入南非世杯決賽,但當年金球獎得主竟然係球會只贏聯賽、國家隊世界杯八強出局既美斯奪得,咩事?所以由呢一年起,金球獎已成為垃圾獎,完全唔係以前果種會考慮埋個人整體表現、對球隊影響力、團隊成績既判審標準。

2012年,杜奧巴幾乎憑一己之力帶領車路士贏歐聯(唔單止決賽入球,之前多場賽事全場奔跑協防),三甲不入;2013年,列貝利帶領拜仁贏哂當年球隊參與既所有賽事(包括歐聯),輸俾C朗;2014年,卻奧斯係德國奪世界杯既絕對核心,入球/助攻/控制大局/協防等幾乎無所不能,三甲不入。而C朗同美斯永遠都可以憑極大既名氣同屈機既個人數據輕鬆入三甲,就算球隊冇成績、自己場上表現幾懶散都好,三甲都鐵定有呢兩位,當中其中一位必然係第一。因此,金球獎改制後既得獎結果係可以全部唔理,比香港樂壇既頒獎禮更加徹底地垃圾。

廣告