今日三之三：我遇上的美好青年(1)
做社工，每日接觸好多人，等我recall返近日我接觸過的青年人先，我覺得佢地好正呀：
1)想做記者的中六女生
有一個中六女仔，佢同我講話自己想做記者。
佢話經歷雨傘運動後，更有決心要做記者，因為政府無能，傳媒真係好重要，作為第四權去監察政府同俾市民知道社會上的事實。好多事實係由報紙傳媒去生產，然而好多傳媒都開始被收編，佢好擔心。
我問佢：你信唔信政治中立？
佢話：唔信，因為無論你選擇做甚麼、不做甚麼其實都已經係取向，有影響，有責任要負。
我問佢點睇機場起第三條跑道？
數據、影響、利弊、分析如何弊多於利、環境評估結果...全部朗朗上口。
我再問不同議題：教育、環境、房屋、貧窮、全民退休保障。佢全部都有關注，有思考，有立場，有理據，大概比好多社工更熱衷、認識更多，思考更深入。
佢成績唔係特別好，大概會俾人話係佔中廢青，但，我覺得比起高分低能，或者高分但不關心身邊人與事的機械人，我更Proud of呢d有血有肉的香港公民。
「你咁關心社會時事香港未來，唔係人人都係咁架喎。其實...你o係學校會唔會好lonely？」
有別剛才的快、Sharp、醒；佢語塞，沉思，然後細細聲話：
「其實都會，有時都會好lonely，唔開心身邊d人唔係咁，咁香港未來會點，我為呢樣野喊左好多次。」
聽到我都想喊，我心諗，學校讓你發揮不了，係香港對你唔住。
「喂，咁你有戰友未？」
「唔，學校入面冇乜，有一兩個。」
「得啦，你去做記者啦，你要信我，你未來會有好多好多戰友，我已經係你o既戰友。就算入唔到大學，未做得成記者，你一定一定一定要繼續關心社會，未來o係出面社區，o係唔同社會議題你一定會有好多戰友。香港需要你！我會記住你個名，希望第日見到你呢個記者。」
佢真係雙眼發光。
我問佢：「你呢刻覺得點呀？」
佢話：「好開心，好想喊」
其實，想喊o個個係我，因為我都唔知我地o既社會蹂躪左幾多o既年青人，喊出黎o既係到可惜到喊，嬲到喊，肉緊到喊。
而你帶俾我對未來的希望，令我流出希望之淚。
青年工作真係好正，青年工作是青年人生轉捩點，也是香港未來的轉捩點。無論未來發展如何，我真係好proud of香港青年人，好proud of自己係青年工作者的身份。