上一次話要多啲碼頭嘅好似係 2008 年吧，話口未完就到金融風暴，唔係話凡事悲觀，但係船公司係最冒進嘅一種生物，次次都建船建到夠幾個地球用，然後爆煲，你睇下老董嘅 OOCL（東方海外）之前幾咁辛苦 cut capacity 就可知一二，其實唔止香港，亞洲區碼頭都一樣塞車，唔好以為香港什麼什麼落後形勢，而係全世界嘅碼頭佬都清醒過船佬好多，唔會同佢癲，睇下 IMF 話 sluggish global trade 係結構性而唔係週期性，你就應有所警惕。 船佬阿董依家佢重出江湖幫港出聲，睇嚟網友幫佢改名做「整瓜香港基金」，真係有先見之明。。。
如果話要睇遠啲，咁我就唔搏海運啦，因為低增值，同樣土地及社會資源耗用，空運增值高海運十幾倍，我反而會搏同樣塞車嘅機場三跑，香港高質物流管理絕對需要維護，而且香港機場係亞洲區 transit hub，一種不受制於大陸需求嘅生意，係香港有條件同大陸頂嘴嘅其中一項戰略資產（講出嚟又俾人話唔愛國喇，呢啲好嘢又係英國人留低嘅），而機場塞車舊年已經開始令到我哋嘅地位受威脅……點樣起先至環保同避開航道問題可以斟酌，但係戰略重要性不能忽略。
當然，我亦唔會同意 689 任內起三跑，因為條友舐共舐上腦，佢一定只會諗點樣裝多啲陸客陸貨落嚟，而唔會諗香港嘅國際戰略，隨時搞咗個空運仲低增值過海運嘅世界紀錄出嚟，結果仲衰過唔起，佢嘅化神奇為腐朽神功，我哋同樣要警惕。