（利申益報：本人用iPhone，又係蘋果小股東，但應該唔係果粉）
既然上次寫電影有人覺得1999膠都廢事俾，今次就唔寫。主要都唔係因為方丈小器，而係事忙。而寫金融（或財經／股票， whatever）係唔多使用腦的。
好既投資一樣，其實都唔使點用腦。坊間同你講要「成日睇住」。睇住乜？睇住佢跌？睇住貓食魚？堆大師同你講要「做功課」「睇年報」之類的廢話，問下畢菲特一年睇幾多本年報咁大把？ 或者見到啲發霉分析員，問下佢一年睇咁多本年報發左達未？我點知？因為我都曾經係。
而你走去私底下問堆「分析員」 （或財演，whatever）或「基金經理」，賺得最多錢的股票，就正路都唔會係「分析」左好耐睇哂年報隻隻產品知賣幾多貨知ASP（平均售價）幾多毛利率幾多公司負債幾多息口幾多之類的垃圾。
話知你個model幾精緻丫。當然係講Excel果啲model，唔係遊艇上面果啲，而正常在公司砌model的分析員都唔會係上船「砌model」。搵到錢既。一般黎講都係簡單過唔簡單，不要問只要信的東西。
例如乜？例如，蘋果出iPhone6果晚，有人叫我訓身買。隻股票啦下，電話遲啲。佢睇好iPhone6必然大賣。
咁幾時買股票都係贏錢企定，輸錢訓低，回報如何？今日（香港時間2月11日）就係果粉，或蘋果股東的一個大日子。大在乜？蘋果收市市值，第一次突破7000億美金。其實舊年年尾都試過，但只係中途掂一掂，收市守唔住。
講過啦，對我地（即係包埋閣下）呢啲窮人，7000億美金咩概念？咪好多錢。咁即係幾多錢？師父教落，遇到大數字，用其他野去比較下你就明。
例如話你知:蘋果既市值，大過谷歌（Google），惠普（HP），推特（Twitter）同雅虎（Yahoo）加埋。
有點取巧？其實推特雅虎好睇唔好食。都係。咁話埋你知，真正搵大錢既，GE （通用電氣，廢事寫「奇異」你又話蝗語） ，或者Walmart（沃爾馬，蝗語萬歲!），市值都係2000幾億。蘋果既三份一左右。
當然仲有之前報紙都提過，蘋果對上次業績，單季純利180億美金，係全世界的紀錄。舊紀錄係俄羅斯天然氣公司Gazprom，睇歐聯或睇德甲會見到呢間野，贊助俄超球會辛尼特（Zenit St. Petersburg。）同德甲史浩克零四（Schalke 04）。
另一紀錄就係，報紙亦有提過，蘋果單季因為強美元的銷售損失 （即係搵少左），己經等於Google一季的純利。正式係「一隻手指捽死你」。
順帶一提，單季蝕錢的最高紀錄係英國公司，作為皇民真係光榮過鄧光榮。咁就梗係銀行啦。正常賣電話賣可樂冇可能一季輸到嘔血。紀錄保持者係蘇格蘭皇家銀行（RBS）
以為賣電話好好搵？又係both yes and no。正路好搵過做投資銀行（下面解，高盛的市值只係蘋果十份一）。賣電話都真係幾好搵，但又，睇你賣乜電話啦下。And I am not talking about 小米華為呢啲「cheap野」。梗係講（品牌上）iPhone的唯一宿敵三叔電子（Samsuk Electronics）啦。
回想當年，喬布斯 （Steve Jobs）先帝創業未半，中道崩殂。三叔就係威係勢，如日中天，阿媽都睇到地鐵越黎越多人用碌乜 S乜之類。而數字亦不講大話，蘋果的market share 一路跌，三叔（及其他Android機）一路升。
事實又係，當年果報呀，一仔呀，甚至教人買韓國股。對，香港都有不太煩的方法買到韓國股，我當年幾乎都想去開戶口買。三叔皇朝喎。諗下好似以前SONY之類咁就興奮啦。諗下做到第二隻蘋果就興奮啦。 唔好忘記，即使當年喬先帝歸西時，蘋果股東都升左N倍。
不過，諗下好啦。三叔機海戰術，大破「食老本」「冇新意」「靠喬先帝個人頂住」的蘋果。結果？而家三叔市值幾多？勁呀，蘋果先得7000幾億。三叔電子己經係200萬億（！）。不過係韓WON。
歷史話你知，呢啲野上得一仔或果報，拎黎做投資明燈就真係幾岩。 2011年大字封面叫大家「不要買樓」。舊年仲叻，出完 1117（滬港通） 列車出軌之後就大升。 到佢話 「阿爺做庄谷A股 H股接力炒上」 後就即時狂插，唔到你唔信。當然還有新鮮滾熱辣的比特幣。一樣係到一仔都做封面，就係頂位。
呢度當然唔係針對一仔或果報。佢地只係成功的傳媒，就反映群眾。到群眾都知，當然資產離見頂不遠。外國一樣係咁。「科春」財富雜誌2007年尾仲叫緊人買美林買AIG，果然 All Investment Gone。
點解會咁？「我唔甘心，明明我堆機好受歡迎」 。果粉或果黑應該都寫過好多篇文講。大約係，蘋果出八千蚊部機都仲有大把人買，你話啲友白痴又好忠心又好，市場不講大話。三叔呢，係賣機賣得多，但好睇唔好食，毛利低好多，其實，with all due respect，在個生態塔中，似係大陸機多過係蘋果。