那一晚是學校基督教週的培靈會，身為一個虔誠基督徒，我絕對不會講培靈會很悶的！！！在我們詩班獻唱完後，有個 MK 仔走上台⋯⋯我無呃你，佢個 look 真係好 MK，唔信你 search 下李林風，睇下佢D相。
原來他是今晚的分享嘉賓。一開口：「其實我好緊張，我好怕喺人前講嘢⋯⋯」我心諗：又講呢 d，明明無手震腳震，口齒仲鬼咁伶俐，大家幾時先捨得戒呢 D 其實人地唔太想知嘅開場白？然後他笑笑口話：「真嫁！我以前係個隱閉青年，隱閉到幾嚴重？就係出街搭地鐵會驚到暈同嘔！大佬，咁多人喎！梗係驚啦！」話畢惹來哄堂大笑。我卻笑不出，你如果稍為認真一點去想像，你就會知道那是段多麼恐怖難捱的日子。不過，他捱過了。
「我今晚黎唔係同你地分享咩神蹟改變左我，信主前後大改變嗰 D，信主前我係個衰人，信主之後我都係。」果然，整晚我也沒有聽到他直線或曲線的讚自己，只是分享自己的掙扎與釋放。
講真，信耶穌信了十多年，我也漸漸討厭去聽誇張的神蹟，如「曾經我係個好軟弱嘅人，但藉住主耶穌，我已經係一個新造嘅人，舊事已過，都變成新的了。」明明舊事其實還在後面緊緊跟著你，還跟足你一世，怎麼自己先戴起光環呢？雖然不少人其後也會補上「當然，我仍然係一個罪人，仍然會犯錯，但我會靠住主耶穌嘅愛勝過呢一切！」我真心相信有這樣的人，但我親眼看見更多人成了法利賽人，站在道德高地成了審判者。我想，我們是新人，也仍是舊人。唯有你誠實面對自己，不是想著拋棄，是學會接納，才能從罪中得救，從愛中得著力量。
Anyway，這裡不是想講福音，也不是想讚李林風 (雖然佢係發起人，真係好叻仔，仲要得25歲⋯⋯)，我想推介一個十分十分有意義的一換一概念音樂會！
BARTER CONCERT 一換一概念音樂會 2015 ，這已是第三屆。
第一屆他倡議用食物換音樂：一個揭蓋式罐頭，一包獨立包裝餅乾和一包紙包飲品才可入場。演唱會收集所得的食物，將會透過「平等分享行動」和「青懷社區組織」分派給無家者和在板間房蝸居的朋友。而且鼓勵食物和小商戶購買，在過程中與店主聊天，重建社區關係。
第二屆是以一份舊琴譜換音樂：收到琴譜後，We Wah 音樂家的義務導師會為基層小朋友提供 3 年教學，讓他們透過音樂建立自信，對學習也有幫助。(筆者聽到呢度，十分希望自己能返老還童，再做一次小朋友，可以免費學音樂)
第三屆名稱為「夠薑用器官換音樂！」。故名思義，每人帶一舊薑去聽音樂。帶舊薑做乜？李林風話「一半用黎煲糖水，一半用黎種盆栽，之後以探訪形式親手交到唔同嘅護老院長者手中。」咩話？你覺得好無聊好無用？車~ 人地李林風一早知你諗咩啦！佢話：「薑糖水及薑盆栽只是一個媒介，重點係過程入面拉近人與人之間嘅關係，我地聆聽需要，我地回應需要！」
其實第三屆主題為關懷病患。音樂會總長度為 125 分鐘，音樂演出佔 100 分鐘，餘下 25 分鐘由以下合作機構的代表分享個人親身經歷(分享內容並非介紹所屬機構)，希望傳遞「關心一件事情不會只得一個方法」的信息。
四個合作的志願機構分別為:
1. 港島西醫院聯網器官移植聯絡部 (7 間公營醫院、政府機構)
2. 牧群關愛會 (醫院內外關懷病患機構)
3. 關懷小丑 (志願團體)
4. 平等分享行動 (民間自發行動)
在這裡我想特別講講關懷小丑這個組織，他們是真的一群小丑，他們卻不只是一群小丑，他們會定期探訪各慈善社福機構，把快樂帶給孤兒、病患及老人。這個世界，對某些人來說，笑容是奢侈的，但不代表他們沒有權利去笑。
看到這裡，你明白為何文章題目會是〈你消費不起的音樂會〉嗎？因為若果你窮得只剩下錢，大概你只會覺得呢班後生仔整色整水，最後咪又係 gimmick，為左錢，為左名，為左利！我會真心替你感到悲哀，也覺得你沒有資格去聽這場音樂會。這個世界，不是所有人都為了利益而行動的。
我錯過了第一屆和第二屆，今年一定會去聽！還會準備好我舊薑！
我想講，如果你覺得為民主抗爭太遙遠，至少你應該去發掘這個常被說「The city is dying」的 Hong Kong，你能夠為她做甚麼。有很多人已切切實實地進行著、改變著。你就算不做發起人，也該做個參與者吧！
BARTER CONCERT 2015
日期：2015 年 3月8日（日） 晚上 7 時 30 分
地點：香港大會堂音樂廳
門票一月於城市售票網公開發售
Facebook: Barter Concert 一換一概念音樂會
Facebook: 關懷小丑
圖片來源: Barter Concert