立即捐款

社運

「我要真小販」擺檔後記(下)

「我要真小販」擺檔後記(下)
廣告

廣告

第二個重點,梗係講返我自己個攤檔啦,個檔係同朋友們一齊搞的,大家都想趁機推廣音樂,將音樂帶進基層,音樂唔係高高在上,唔一定要俾好多錢,音樂可以好貼地,好易玩,而且想做到同樂,無論有無學過音樂,都可以來參與。

個檔唔係賺錢的,係用交換型式,我地準備左「作曲接龍」,邀請大人小朋友過來一同作曲,每人來寫個音符上去,幫我地完成一首歌,無論識唔識音樂都可以隨便畫,我地要相信集體智慧,為左答謝街坊貢獻創意,我地就送返份小禮物。

最常見的街坊反應係︰「下?我唔識音樂架wor,邊識呢D野呀?」經過一輪鼓勵,街坊就會拎起筆好用心咁畫,好緊張咁問︰「個音符咁樣岩唔岩?」,之後就好滿足要影相留念,有一位街坊話要Post上FB,在呢粒音符tag返佢自己 ^_^。設計呢個「作曲接龍」係想大家共同參與,由「邊識呢D野呀架」到踏出第一步嘗試參與其中,希望佢地明白,自己寫上的一粒音符係好重要的,共同譜成一首歌,無論好唔好聽,都係由大家共同創作。

(呢個idea係從深水埗洗樓過程中啟發到,有D街坊好多無力感/自卑感,覺得自己唔識民生民主的議題,唔認為自己有能力參與公共事務,需要一D鼓勵……..)

我地的小禮物之中,主要係口琴,一種輕巧平價又好玩的樂器。一諗到學樂器,人人都諗彈鋼琴,但基層市民好難負擔學費,而且鋼琴又貴又大舊,劏房家庭點樣放到部鋼琴?所以,口琴可能比合適,Size雖細但可以奏到好多好聽音樂,我地有個口琴高手即席示範,我拍檔仲準備左口琴吹奏簡介,街坊拎返屋企可以自學。有個街坊來玩「作曲接龍」,然後好開心攞左個口琴,話係俾佢侄仔的,等小朋友可以學下樂器。

另外,我地準備左兩部玩具鋼片琴,無錯,係玩具!我响深水埗玩具街買的,再準備左d簡譜,係想俾大家知,其實簡單玩具都可以玩音樂,彈到天空之城、小星星、歡樂年年等,連越難越愛都彈到XD,但個琴係平價玩具,的確係有d走音…….好唔好聽見仁見智啦….

我自己覺得今次擺攤好好玩,希望路過我地攤檔的街坊都會enjoy啦,亦希望下次再有機會擺活動宣傳音樂!亦謝謝一同幫手的朋友們!

廣告