「我知道我好多缺點，我都好難頂，但你都好多缺點，你都好難頂，我希望......我地一路頂住大家。」
四年前，當我喺大學同班戰友趕緊Project時候，電視播放住萬千星輝頒獎典禮，當胡杏兒拎最佳女主角後，喺過百萬電視機觀眾前作一個深情感言，令我留下一個深刻印象。當時我身旁所有女性朋友都大嘆感動，亦從電視機畫面中感受到所有藝員同事起哄當中一份甜蜜，不禁令人回心微笑，畢竟呢件事都係開心野嚟，而作為男仔嘅我，聽到一個女人真誠地表達呢番說話同愛意，我都感動咗。
雖然唔洗一年後，胡杏兒同黃宗澤分手了，亦結束雙方長達八年嘅感情。八年，係八年，即使我快速由1數到八都要幾秒先數完，更何況實質時間? 八年感情，一下子就無咗，感覺到愛情相當化學，估唔到當晚深情宣言後竟然得出咁嘅結局。
其實我好欣賞胡杏兒，雖然大家一聽到佢個名嘅時候，好多都惡評如潮，並為佢加上好多個花名，正面啲嘅，話佢似蒼井空（我唔知咩水），負面嘅有「肥杏」、「胡囧兒」、「胡囧囧」、亦扯上「樣衰」、「屌都廢事」嘅標籤。首先，我從來唔覺得佢樣衰，你可以話佢唔靚，但絕對唔會係樣衰吧!? 更何況，我見過佢真人，覺得佢真人靚過上鏡好多，胡杏兒絕對係一個靚女。
雖然大家對佢演技有保留，亦因為佢浮誇演技而感到厭惡，甚至反感。但我主觀地覺得，只係戲路唔太適合佢，加上CCTVB大量密集浮誇式「阿媽係女人」質素劇本需要佢飾演，難免令人覺得討厭。佢有進步空間，但我亦不忘佢曾經令我流淚，我仍然好記得當年『流金歲月』呢套電視劇，佢飾演羅嘉良細妹丁善茵，一個輕度弱智人士，劇中喺法庭一幕令我流下男兒淚，自此我就覺得胡杏兒係可造之才，演技絕對唔係差。唔知大家記唔記得佢曾經為『肥田囍事』電視劇而瘋狂增肥，一個擁有香港小姐身材可以為劇而犧牲，但最後得到嘅評語係 「肥杏」等惡評。
其實點解無啦啦講佢，只係琴晚同班朋友吹開水，無啦啦好無聊咁講下有咩TVB藝人係正嘅，比著以前我提出胡杏兒時候，大家一致反應都係『重口味』，但當晚我提出時候，大家反應竟然無咩反感，亦不忘當年佢曾經深情感言嘅畫面。
以前年少氣盛，睇女人好多時候都係睇外表，但人大咗，明白到靚嘅背後性格先係最重要，慢慢由重視外在美，轉移到內在美。亦都想了解一下胡杏兒呢個人，雖然唔識佢，但唔知點解感到佢份「真」同努力。佢其實唱歌都好好聽，大家可以聽下佢首「幸而」，令我Loop咗好多次，連雷頌德同側田都點名讚佢。
呢家每次電視做緊萬千星輝頒獎典禮時候，見到黃宗澤同胡杏兒坐埋同一個地方，我喺諗，胡杏兒有咩感覺呢? 當大家喺黃宗澤面前笑緊佢啲緋聞時，胡杏兒又有咩感受呢? 八年感情，一定經歷很多，投入很多，以一個女性，係過百萬人面前作一個深情宣言，證明咗呢個女人真係好愛對方，因為你永遠都想像唔到講呢番說話後面需要幾大勇氣。
分手過後，男方感情路上似乎多姿多彩，女方而食咗多年長齋，最近亦搵到心儀男友，雖然佢男友爆出夜浦偷會三女，但胡杏兒亦堅定信任對方。男人係仆街，但總有好人，而我希望胡杏兒能夠得到一個好好嘅幸福結局，畢竟輸了八年感情，如今等待多年，終於搵到一段值得投放感情嘅男友，如果再出現什麼問題時候，咁對胡杏兒太不公平，至少我覺得一個好女人唔值得受到咁嘅下埸吧?
「我知道我好多缺點，我都好難頂，但你都好多缺點，你都好難頂，我希望......我地一路頂住大家。」
如果有女人肯同我咁講，呢個女人，我娶梗。
希望胡杏兒繼續加油，亦好似你首歌《幸而》一樣，杏兒有愛。