「囡囡，今日陪爹吔去交封信畀政府好唔好？」封信入面，係一班 IT人對特首選舉嘅意見，同一千二百個簽名。
當我地差唔多去到政府總部嘅時候，囡囡問我：「爹吔，點解我地要選特首？」我話：「因為香港係我地嘅屋企，你第日大個左，要係度住，好似爹吔咁係度搵食，或者會結婚，仲會生小朋友。呢個屋企對你好重要，所以我地要揀個好好嘅人黎保護佢，等佢唔好被老鼠小強入侵，咬我地啲食物，搞到我地肚痾呀。」
囡囡又問：「咁點解我地又要有普選呀？」我話：「囡囡，你可能唔知，人人生而平等。平等係咩意思？就好似你讀書唔係最叻，但老師都唔可以唔答你問題，唔教你做功課，甚至乎唔畀你返學。普選就好似人人都應該有書讀一樣，人人都可以選佢鍾意嘅特首，又可以走出黎畀人選。咁樣，呢個世界先至算係公平架。」
囡囡再問：「咁點解爹吔你地又寄信畀政府反對普選？」我話：「我地唔係反對普選，而係反對『假普選』。政府講大話，呃人話會畀普選大家，但其實係佢地有人揀左先，然後至到你揀。呢啲係『假普選』黎架。囡囡，做人要誠實，千祈唔可以講大話，但係如果有衰人講大話呃你，你一定要出聲指証佢呀，知唔知？」
我唔知個囡明幾多。係一個指鹿為馬嘅年代，我唯一可以做嘅，就係好好咁教佢咩係啱，咩係錯。
我地手上果份有一千二百個簽名嘅意見書，就係為左要將事實寫入立法會文件，令後世記得政府今日講左個彌天大話。
文：Tony@前線科技人員議政小組