政經

本是同根生,不如返非洲尋根?!

廣告
本是同根生,不如返非洲尋根?!

廣告

血濃於水,本是同根生,呢類說話係土共特區傀儡出賣港人利益時候最喜歡講嘅。

上上一代嘅從鄉下落嚟,深受感召,無可厚非;但係今時今日仲有一堆戰後係香港土生土長,甚至新生代的大中华膠/港豬擁抱呢類說話,話要包容包容,互相融合, 真係十級奇怪。無錯,香港人大部分祖先都係大陸落嚟,咁又如何?英國從1707年合併三百幾年,到蘇格蘭人要公投獨立,英格蘭人有同佢哋講 blood is bloody thicker than water 嗎?美國白人的祖先多數係英倫人或德國人,你有無聽過佢哋俾人問點解唔返去偉大祖國母親身邊?佢地會唔會俾英國人問點解唔認自己做英國人,又或者要叫自己做英國美國人? 人地隔咗個大西洋,我地隔咗條深圳河,但係呢個差距唔係用實質距離可以量度。一個城市,一百幾年前同一河之隔的另一方發展出唔同嘅文化,制度,認同,真係咁血濃於水?不如大家都尋根尋到底,返去幾十萬年前嘅非洲,全世界一家親?

歷史從来只有強權無親情。俄羅斯同烏克蘭係歷史上嘅淵源,絕對強於香港同中國,而家俄佬有同烏克蘭血濃於水嗎?說什麽香港自古以來是中國不可分割的部分,又唔見你去同伊朗講花喇子模國是中國不可分割的部分?血濃於水,蒙古不是等於中國嗎?講真,以中國之大,吞併香港之小,易如反掌。你學俄佬光復Crimea,二話不說開坦克入來,我無嘢好講,因為歷史真係從来只有強權,亦都唔需要講乜自古以來是XXX不可分割的部分。講講本是同根生,就呃到大部份人三十幾年,中共比起俄佬真係青出於藍。

講開Crimea,其實俄羅斯只係喺1783年由鄂圖曼帝國手上搶過嚟,咁Crimea啲土耳其人(史稱Crimean Tartars) 去晒邊?無錯,俄羅斯之後大舉殖民,到史太林將佢哋大舉遷移到西伯利亞,咁剩餘嘅就變係Crimea嘅少數民族。人口換血,不是正在我城發生嗎?你問我,香港會否奇跡咁好似一啲東歐小國咁最終安然生存,我唔知道。但係,如果大部份人仲係相信血濃於水,本是同根生啲大話,好快就連自己都會被連根拔起。你可以有千百個理由反對香港獨立或者進一步自治,但係你用本是同根生, 血濃於水啲垃圾理由,唔該你收皮。

Photo credits: On.cc

原文刊載於本土文集

廣告