﹣你玩厭咗未？
Facebook出現初期，每個功能都充滿新鮮感，找回了不少舊朋友、Restaurant City交換食材、Upload相片，寫一個Status，會有人“LIKE”，簡單快捷又好玩，不是非一般的交友平台。
時至今日，雖然FB還是離不開生活，一天也不可以，卻令人有點越玩越無聊，像拍拖已久，激情已變成感情。
更新一下近況？太瑣碎太Personal的話，別人會心想：「喂，又唔係咩國家大事好笑野，關我鬼事咩？咁都post出嚟！」對，你一個Status能夠比即時新聞、雜誌媒體、明星歌手……的status有趣搞笑吸引嗎？還有外國源源不絕的搞笑影片，得意BB、狗仔貓仔、健康潮流資訊呢？
好了，到真的有大事發生在你身上，Touchwood家人有事，打上facebook人又有人說你搏同情；分享好人好事又話你呃LIKE做乜啫你？情侶講生活情趣又閃光彈鬼唔望你地快啲散；日日upload食左咩去過邊度買左乜唔駛多講，兩隻字「煩膠」……
到頭來，FB不再是一個分享近況的平台。你發覺開始沒有什麼好說，說了又怎樣。FB己成了資訊台。 當想談及自己的大城小事，間中抒下發嘛，你卻已經縮到最小仿佛不存在，戰戰競競坦白分享心事，一兩秒就被「碌」走了。
玩Game？FB仲有GAME玩架嘛！一齊玩啦唔好咁DRY……屌你啦！咪撚再Send 啲invitation畀我呀！
﹣ 你忘記咗未？
以往在Xanga裡，幾乎每人也是流水帳的寫生活細節，盡情發洩抒情，寫的人自由自在，看的也了解到朋友發生什麼事。搞笑影片圖片J圖也不是當中重點，只有大家個日個排發生乜事， 你幾點刷牙我都知道。不引人發笑，但還是看得津津有味，大家的距離近一點，更何況Xanga能追蹤有誰Login到訪過，我也不經意的讓你發現我來打探過你， 今天過得一切平安。
你話其實以上功能FB都有，但Xanga其中一個特點是，個人風格。 你可以自已Design版面，wallpaper，字型顏色，還可加插Background Music等等。男的黑白Style裝帥，女的迪士尼樂園童話世界。苦苦經營架！像買了一層樓，自己裝修後坐在梳化欣賞， 自我陶醉，即使無人Like，無人睇都OK ，你都唔會日日叫一大班人嚟你屋企開P啦！FB呢？記得當初轉Timeline時有多不情願嗎？現在我已記不起從前的FB是怎樣了。
你說，唔好再懷舊喇，成日都話以前好啲做乜啫，過咗去喇，要Move on！要成長！但有些回憶的確值得記著，褪色了就偶爾回味一下重新著色。試試閉上眼，記一下……ICQ icon那朵花慢慢由紅色漸變成綠色，傳來一聲「喔噢！」，再隔一會兒，MSN被狂震，原來有人叫你玩踩地雷！