林行止話，美國QE會變成新常態，甚至可以註銷債務，當冇借過，易借，但唔駛還。反正又沒有通脹，新債繼續，好過種金。呢個遊戲唔知幾時爆，反正未爆，美國經濟仲復蘇添。
呢個可能係國王的新衣：個個心裡面知，不過唔講，仲話經濟轉好時就可以停QE，可以還清債務。林行止只是故事裡的小童，踢爆這個國王。究竟呢個係資本主義的長期危機，定係資本主義新的黃金時代？
林行止話，上個世紀日本試過，但係唔work。呢個世紀最早知道借錢可以唔駛還可能係中國當官的。否則中國地方政府債又怎會高達30萬億？今年到期都2.8萬億。
大陸地方政府日借夜借唔知幾時還，搞到內銀有好多債仔，升極都係咁上下，PE得個位數字應該好吸引，但都冇人長揸長買。呢兩日內銀升得好興奮，睇下可以好幾耐？好多大師都話會升，我一於爬逆水，我沽。
其實即使你唔係我咁包拗頸，我都勸你咪大大注買內銀，更加唔好同內銀談情。內銀冇一間可以做到以前匯豐（5）咁，長揸長升，冇一間係長線增長股。講起匯豐，真係往事只能回味，呢六七年就跌到喊，呢排被歐美政府話佢幫人洗黑錢，等住被重罰，股價跌到65元，揸住匯豐認沽證都唔錯。阿Q地講，佢都叫風光過，風光過後係香港股市冇人取代到佢以前地位，成為散戶長線最愛，所以真係一個傳奇的消失，一個時代的結束。
國務院去年十月要求地方政府依法適度舉債，但不得通過企業舉借，債務規模要受限，中央表明不救助。根據新規定，地方政府可申請發行地方政府債券，或變賣政府資產以償還債務。前日財政部確認已下發一萬億元額度，供地方政府以債券置換存量高成本債務，即係新債冚舊債，用長期低息的直接政府債來救命。但是，誰去買呢種所謂「置換債務」？又係內地銀行啫，咁即係又係銀行借俾你地方政府，銀行都係擺脫唔到地方政府這個債仔。
咁搞法，你呢排最多可以借消失炒下內銀，但唔會長久，我唔相信內銀會突然長升長有。夠膽嘅，睇準個高位，沽佢黎賺錢，易過等佢升，收息更唔駛諗。即使呢次沽唔中，下次都會成功。
利益申報：筆者擁有匯豐及內銀的認沽證