立即捐款

中大人口販賣關注組

博群計劃旗下的學生組織,探討全球人口販賣情況、主力關注香港及內地被販賣並從事性工作的問題。雖然關注組得幾個人,但希望由學院開始,令愈來愈多人關心這個議題。 網誌

社運

馬丁路德金既夢,真係實現左?

馬丁路德金既夢,真係實現左?
廣告

廣告

近期因為雨傘運動,好多香港人都對《馬丁路德金—夢想之路》呢套電影好有興趣。呢個人權運動既偉大領袖曾經講過:「I have a dream」。佢既夢就係實現人人生而平等自由,解放黑奴。而隨住1963年《解放奴隸宣言》發佈,奴隸制度亦逐步被廢除,去到1965年,美國既憲法已經禁止境內一切蓄奴既行為。似乎,馬丁路德金既夢已經實現左?

解放奴隸既夢其實並未完,係我地身邊,依然存在好多奴隸被強迫勞動。可能你會話,嘩... 「奴隸」咁大件事?根據聯合國既定義,人口販賣(human trafficking)或者我地講既現代奴隸(modern slavery) ,就係用暴力、威嚇、欺騙既手段,去令人勞動或者提供服務,過程中可能涉及剝削、被迫勞動、被迫欠債、勞役等等。據估計,全球有至少二千一百萬既奴隸,其中75%係被迫勞動,呢班被迫勞動既人,就係supply chain既另一端幫緊我地去做野!

唔知以下幾個同slavery 有關既品牌,你又接觸過幾多個?

A&F

A&F 作為港大學生既「校服」,你衣櫃又有冇一件?著住件A&F, 梳番個ABC十零分界既頭,行出街都幾型既。 至少A&F 個CEO都話過有型既人先著得起A&F丫 。

但型既背後,你又知唔知有幾多工人為左一件衫流過幾多既血汗、甚或賠上自己既性命? 2010年International Labor Rights Forum 中, A&F 既產品被點名指出來自「血汗工廠」及指出A&F製衣過程透明度極低。工人一日工作十二個鐘, 每星期工作七日。工作環境惡劣, 完全冇任何保障。A&F 為左減低成本, 選用左「噴砂」技術去打磨牛仔褲, 令到工人係過程中吸入大量灰塵, 最後更會引發肺結核致死。2010年12月,A&F係孟加拉既工廠亦因為安全設施不足發生火災,奪去了29個工人的性命。知道左呢一切後,你仲覺得著A&F型嗎?

雀巢公司

有邊個香港人未食過雀巢產品?未飲過雀巢咖啡都應該食過雀巢雪糕掛?但原來幫雀巢種可可豆既係一班被人口販賣既小朋友。雖然佢地至少一日工作十四小時,但賺得既錢都唔夠比佢地買朱古力食,佢地絕大部份都唔知道朱古力係咩味。 更令人憤怒既係,呢班小朋友被剝削基本既教育權利、甚或人生安全受到威脅!只要佢地做得唔好,監工就會鞭打或毆打佢地,若果逃走更會遭到殺害。國際勞工權益基金會(ILRF)控告雀巢涉嫌間接介入種植與採收可可豆童工的人口販運、虐待、與強制勞動;2005年Public Eye Award 就將雀巢公司評為最不道德公司;菲律賓雀巢既工會領袖佛圖亦因帶領罷工被刺40刀身亡… 你杯咖啡,流著誰既血?

Apple

相信唔少人仲記得Iphone 6 一推出時成為左熱話,部機炒到有價有市,個個排哂隊爭住買。但仲有冇人記得2010年Apple 零件生產商富士康工廠出現員工連環跳樓自殺?富士康員工一直得唔到合理工資,經常要求員工超時加班,工作條件又非常苛刻,要員工長達十二小時企係到工作。你諗下你老細日復日叫你企係到做一個重覆工序做足十二小時以上,俾你都會人都癲啦,仲要做完人工得雞碎咁多!又點會唔情緒低落丫!

UNIQLO

UNIQLO一直深受歡迎,除左價格相宜,款式亦好多種類,好快就成為左香港人經常光顧既品牌。「讓世界朝更好的方向發展」係UNIQLO營商既承諾,但事實上UNIQLO 對待工人既行為實在令人髮指。去年有人權組織派人係UNIQLO係中國既工廠做臥底調查,發現廠商長期壓榨員工,唔單止工人要每月加班到100小時,遠超過法定既36小時,工人仲要係四十度高溫環境下工作。人體最高可承受既溫度係四十二度,長期係高溫環境下足以令到器官機能衰竭。工人們熱到要赤住上身,日以繼夜係個大蒸爐入面趕工,就係為左整你件UNIQLO羽絨、UNIQLO HEATET... 覺得諷刺嗎?

後記:經大學師生監察無良企業行動(SACOM)揭露左事情之後,UNIQLO矢言將作改善其產地貨品供應商工人既工作環境同加強監督。至於成效如何就靠大家繼續監察喇!

其實以上既例子都只係信手拈來既冰山一角。可能你都可以想象得到,一個都市人既生活充滿住血汗工廠換來既產品— 起身第一時間摸到果個電話係咪apple/ Samsung? 有錢既,朝早飲既係咪starbucks?無錢既,都會飲雀巢掛?打開個衣櫃,有無件UNIQLO、GAP?鞋櫃有無對NIKE、CONVERSE?有錢d既女仔,屋企又會唔會有個GUCCI銀包手袋?

睇完呢d,有點扎心嗎?

咁可以做d咩?

1.了解你既 Slavery foot print

可以click入去呢個網站,做一個問卷,根據你既生活習慣,例如係用咩個人護理產品、電子產品等等,推算到底你既生活中,有幾多個奴隸幫緊你做野。

2. 要求商家關注mordern slavery

可以透過slavery foot print呢個網站,對你關注既公司提出要求,共同施加壓力比商人。或者你可以自己直接向唔同既商家提出疑問,了解產地貨品既生產者處於咩狀況。

3. 繼續了解

可以click入呢d資源庫了解更多現況同埋你可以做d咩

(i) CNN既Freedom project

(ii) 聯合國既人口販賣報告

4. 罷買

係,筆者都無可能完全唔買呢d產品,畢竟產地實在係充斥係我地生活既每一小部分,但好想係下一次再買野前,大家都多留意你地喜歡既品牌,用緊咩來源既產品。如果係用緊血汗工廠既產品,希望呢一點會成為你選擇既重要考慮因素。問問自己,個品牌既形象,係咪真係好似廣告塑造得咁正面呢?

可能你又會問,我地買少果一兩件野,對件事有用咩?MADE IN A FREE WORLD比左一個圖畫我地。呢個本來就唔係一個公平既仗— 每年商人用奴隸賺緊150億既美金,而每年慈善放係打擊現代奴隸既錢只有1億2千萬,點打?但係你同我,影響既果個市場,就大大遠超呢d價值。

講完返返現實,其實都係雞蛋同高牆。但你唔係唔試下改變呀嘛?「One day when the glory comes, it will be ours!」我地期待,每一個奴隸都可以得到公平既果一日,到時,為佢地改變過生活選擇既每一個我地,都可以共享呢份榮耀!

中大人口販賣關注組 Facebook 專頁

廣告