文：何松江（荃灣民生動力義務總幹事）
小時候，覺得旅行呢樣活動好無聊，香港乜都有，其他國家有乜好去？
人大咗出咗嚟社會工作，就明白旅行對自己有咩意義。
第一次搭飛機，27歲，目的地係台北。原來台北啲街邊嘢咁好食，大大大雞扒，大腸包細腸，胡椒餅........亂七八嘈的普通話都可以同當地人溝通到，台灣的女仔又多份柔弱。台北真係啱晒我呢啲，鍾意飲飲食食的宅男。
第二次搭飛機，28歲，目的地係東京。乜原來日本地道的食物，同香港咁大分別架？壽司識食一定係食大拖羅，拉麵求其搵間都好好味。自稱宅男，原來秋葉原果種宅，根本係第二個次元，發現自己何其渺小，打吓機睇下漫畫無資格叫宅﹗東京的女仔好友善，又靚(個妝)。東京已經成為我每年去旅行的首選，可惜福島事故之後，都唔知幾時再可以去東京了。
然後，29歲，目的地係曼谷巴提雅。十幾蚊港紙一碟的豬手飯，海南雞飯，點解可以咁好味？泰國的煎蛋，真係有特別有蛋味；泰國的白飯，重拾我失去多年的兒時回憶：我細個同公公婆婆住，佢地煮的飯就係咁既味，可能日日都食飯，沒發覺到原來香港既白飯，已經無晒飯味。原來好多泰國的女仔(堅係女仔)，皮膚都好白，好多都好似混血兒咁，東南亞嚟講泰國女仔真係無得輸﹗遊客區基本上講廣東話都無問題。曼谷已經完全取代咗台北的位置﹗(註：小弟完全唔識游水，所以巴提雅的印象，係有好靚既陽光沙灘，係有好多鬼佬拖住啲好核突既泰國女仔，同埋珊瑚島既燒雞脾斬件)。
我仲去過南韓、越南、東歐等，其實每個地方，無論是飲食文化，風土人情，都各有各特色。好似飲飲食食既，一定係泰國、東京；如果想見識異國文化，越南、京阪神，東歐係唔錯既選擇。
突然間我喺度諗，如果我係外國人，我點解會選擇香港作為旅行的目的地呢？
香港以前係東方之珠，購物天堂。全球化之後，大家會選擇去啲匯率較弱既地方購物，因為世界各地都唔難買到出名的牌子，唔一定要嚟香港(我都好想狗衝去東京，可惜)；而且依家一街都係金鋪，大企業為咗賺錢，剩係招呼內地客人，搞到啲生態亂晒；如果一個地只有花花草草，點會有獅子老虎生存到？如果一個地方全部都係獅子老虎，邊會兔仔同羊喺果度出沒呀？生熊，最重要係平衝，一個完整既食物鏈係好重要，可惜依家已經俾金鋪同藥房破壞晒。
再者飲飲食食，香港講嚟講去，奶茶，燒賣，魚蛋，飲茶，海鮮。講真我覺得唔差，但係因為租金俾啲生態問題搞到亂晒，有特色既小店已經所剩無幾，全部比大集團壟斷晒，味道上同特色上，一定唔會有啲咩突破。
呢輪成日話反水貨客的活動影響旅遊業，我同意或多或少一定有，但如果香港旅遊業繼續咁落去，不斷鼓勵內地人嚟買名牌買奶粉，就當係旅遊業的發展，只要內地人放心在中國購買名牌和奶粉，或者內地經濟逆轉，香港就會玩完。根據香港旅遊發展局的數據，中國內地遊客所佔的百份比，由2010年的59%，升至現在的80%。
一個完善的制度，應該要有良好的風險意識，不好將所有注碼，全押在某一個選項上面，唔係包贏架大佬。旅發局，幫香港搵返個香港特色出嚟，比多幾個原因啲外國人，點解要去香港旅行啦！