是咁的：不久前，我遇上一位五歲小童，姓麥（下稱麥同學）。佢阿媽叫麥太太，佢老師叫Ms Chan Chan。麥同學很喜愛食雞，例如雞飯、雞包仔、四寶雞扎、豉油皇雞翼、雞pat pat，以及麥甩咯（chicken nuggets）。很可惜，現實當中，屋企樓下的北京樓只會提供鴨。上到酒樓，叫了四寶雞扎，擺在餐檯上的，卻是荔芋火鴨扎。酒樓阿姐林師奶拿不出雞，就死也要把鴨扎講成是雞扎：「係雞扎呀！唔係你咪當住係先囉，食住先啦！」麥同學心想：「下下一定要duck？唔得！唔得！點算啦？點樣令隻雞變做鴨？」旁邊阿聾耳梁、賣魚譚、禿頭袁等，嫌麥同學太麻煩、太不聽話，便厲聲訓斥道：「食食呀食食懵你！」麥同學見勢色不對，唯有硬啃。一啃，就啃一世。
有一日，麥同學變了臘鴨，每天重複又重複唱：「我最終變臘鴨！鴨！鴨！鴨！鴨！」
等等！講不通啊！明明要雞，為何結果卻來了鴨？林師奶指鴨為雞，豈不是欺騙小孩、講大話？發生了甚麼事？原來林師奶以及旁邊的阿乜叔乜伯，都與酒樓老闆串通好，因為大家都買了北京樓的股份。他們明知酒樓無雞賣，怕無生意，長遠而言無得撈，因此便對外說有雞，點心紙上也寫有雞，然後只提供鴨：炸子雞變燒鴨、豉油皇雞翼變滷水鴨掌、麥甩咯變香酥鴨粒。當食客不滿，要投訴、要揭穿謊言，師奶叔伯便連成一線，一而再、再而三說那是雞：「鴨就是雞，雞就是鴨」、「鴨扎有雞的成份」、「點心紙上每一樣菜色，裡裡外外前前後後左左右右都充滿你老闆的愛！」、「中國人做雞有特別多的方法！」。最後還加句「食雞？食食呀食食懵你！」
有些食客被搞亂了，以為火鴨絲炆米真的等於雞絲炒麵，便照食了；有些則死也拒絕食，結果不是被趕走，就是老闆報警把他們拉了，他們還被其他食客責罵為「戇居、廢物」。當然也有像麥同學一樣的，明知鴨扎是鴨不是雞，但形勢比人強，唯有食食呀食食一世，最終變臘鴨。
香港人，你要的明明是雞，北京樓卻要你「一定要duck」。你要有得選擇，還是願意「最終變臘鴨」？