文：何松江（荃灣民生動力義務總幹事）
今日TVB竟然邀請了黃毓民議員做「講清講楚」的嘉賓，一向很少看TVB時事節目的我，姑且看一看如何「無線新聞，事事偏頗」。
主持何文雯，第一個問題便拾人牙慧，引用黃毓民剛提出的例子反問返：「如果老師要選班長，揀3個出嚟比同學揀好啲，定係老師自己揀好啲？」
政府策略一 之 「抹黑泛民為反而反」
「以子之矛攻子之盾」的問題，並非要為難黃議員，實為要令觀眾覺得所謂反對派 / 泛民係「為反而反」，有好啲的選擇唔揀，為咗反對而原地踏步。呢啲題目真係好啱啲傳統上一輩的口味，長輩普遍都是「活在當下」，而「將來」永遠都是年青人的事。當然，呢個論調，唔單止係TVB的專利，政府、建制、及大部份媒體都係用呢個「好啲好過無」的方法向普羅大眾，尤其係沉默的大多數以及政治冷感的巿民，進行在大量洗腦。
當中黃議員更舉例：「先進國家，討論的是食麵包好，還是食飯好；我地仲係討論緊食飯好，定係食糞便好。」可能因為直播節目，黃議員很克制，實際上並非是「飯與屎」的決擇，而是「屎與爛屎」的選擇，並且要懷住感恩的心去食。
政府策略二 之 「混淆視聽」
緊接著，就係討論「提委會出閘及入閘」。其實開始討論「入閘」，就知道政改3人組不是泛泛之輩。因為這招混淆視聽，令「沉默的大多數以及政治冷感的巿民」覺得10分之1呢個門檻好低，「泛民仲嘈啲乜鬼，政府都讓步，你仲咁多要求」。當我地去解釋「入閘」同「出閘」的分別，你發現已墮入了圈卷，對方根本唔會聽得入耳，「政治冷感」就根本無興趣詳細了解。
及後，就何文雯稱，有人認為「若通過政改，大家有一人一票表達意見，例如用白票或低投票率，以輿論壓力去表達對制度 (如民望高的未能出閘、有篩選) 的不滿。」事實上，80萬人電子公投，數以10萬計的巿民經歷79日佔領行動，這等輿論壓力政府及中央也嗤之以鼻，依家故我。請問用白票及低投票率，大家期望會得到咩效果？呢種「有好過無」的盛女心態，實在荼毒蒼生，唔知何小姐有無聽過「寧缺勿濫」、「男人最怕入錯行，女人最怕嫁錯嫁」。
轉眼間引導返大家去「政府策略一」繼續洗腦。
「如果你對政改投反對票，即係你向1200人選委會(舊制)投贊成票？無100%民生就寧願原地踏步？」第一個問題簡直荒謬加Naive﹗假設單身的妳，有個男仔向妳開追求，但妳拒絕咗佢，佢話「咁即係你寧願單身，都唔想拍拖啦？不如我地拍住先啦。唔通你無高富帥就唔拍拖？」各位女士一定會明白，無高富帥唔等於要同你拍拖囉。第二個問題「原地踏步」轉眼又引導返大家去「政府策略一」繼續洗腦。
黃議員及後講關於否決政改以作為抗爭，爭取更多民主。何小姐說：「如果你否決咗袋住先方案，你覺得可以迫使到中央政府比香港真普選嗎？」最後笑住加多句：「你真心咁相信？既然你唔信，咁你爭取啲咩？點解你會覺得用「否決」呢個手段，可以迫使中央比真普選香港？」
天呀，記者讀咁多書為乜？呢種係認命同屈服，甚至係奴性，點解可以講到咁擲地有聲？可能無線習慣了一台獨大，連啲員工都很自大，忘記咗「大衛與哥利亞」、「溫泉關戰役 (戰狼300)」、「官渡之戰」、「赤壁之戰」等等典故了。直到最後，講嚟講去都係講政改的所謂好處，點解要原地踏步，唔袋住先。繼續抹黑，繼續扣帽子。
誰害怕真普選？誰硬推假普選？就是一班「無能的既得利益者及當權者」。只要涉及自由、民主、獨立，就嚇得屁滾尿流。有能之士永遠不怕公平競爭，無能者為了保衛自身的利益，機關算盡，無所不用其極用主流媒體、假民意、假權威、假道學，窮人含忍的法律，有恃無恐的警力，什麼合憲合法，什麼程序公義去干擾，恐嚇，打壓，讓大家活著煩擾及恐懼當中。政府越著力宣傳及推銷，我認為我們更值得去了拒絕，我相信「有麝自然香，何必當風颺」。
一直有人說：「民主可以做什麼？當飯食嗎？」這論調啱晒「努力地生存」的大眾，以及從前由基層捱過，現在已經上岸的長輩們，一再強調生活比民主重要，不斷將我們推回「需求金字塔的底層」–生理需要層，當然有政府強勁的房屋政策配合。有啲咁既廢柴論調，要有啲咁既廢柴政策，大家配合埋一齊，先可以搞到我地咋嘛。
事實上，比起有人荒謬到「唔出糧都要有水砲車」，我地爭取的係更實務，「食少啖飯都要有真普選」，其實我地唔單止係爭取係民主制度，而係香港人一直都擁有，亦賴以自豪的「社會文明」。拒絕洗腦，拒絕謊言、拒絕老人政治、拒絕蛇齋餅糭的民意授權、拒絕維穩換來的假民意﹗2015年區議會選舉及2016年立法會選舉，靠大家了。認住佢地﹗
電影【麥兜故事】的主題曲，早於2001年已告訴大家：「但現實就似一隻鴨，吓吓一定要Duck。唔得！唔得！點算呀？點樣令隻雞變做鴨？」
2017一定要得？點解一定要得？「鴨的雞不了，假的真不了」。