因為一連串內部問題，印尼足協(PSSI)宣佈2015年QNB印尼超級足球聯賽今季暫時停辦，呢個舉動引起印尼全國關注足球運動嘅人民之密切關注，告別雙胞鬧劇後印尼足球聯賽依然難逃亂局命運，呢邊廂有香港波球迷質疑新上馬之港超聯係「港超亂」，果邊廂實力距離不遠之常見對手印尼國內球壇查實比你亂得多，呢啲至係亂，對比之下港超聯根本就係一個極度正常嘅聯賽，邊度有資格自稱「亂」，香港波球迷簡直就似未見過大蛇屙尿一樣。
講返主題，暫時停辦所有聯賽，第一受害者一定係球員，因為等同失業，即使有球員同球會簽咗合約，即使冇賽事都有人工，但都要面對因為冇賽事令球會失去資金來源嘅問題，即係話如果問題持續落去嘅話，今年可能會有好多欠薪事件發生，雖然欠薪事件係印尼球壇係一件如屙尿一樣咁平常嘅事，另外獎金對部分球員非常重要，冇賽事即係冇獎金，靠分薪分分鐘自己都唔夠食。鬧劇不斷，受害者首當其衝非話事人而係球員，冇錢睇病要行乞最後病死街頭、追討唔到欠薪而要賣果汁為生嘅真實個案可能會在現。
第二受害者就係印尼足球，今時今日印尼足球喺亞洲已經冇乜地位，如果無限期停辦聯賽，球員長期欠缺狀態，有機會影響國家隊喺國際賽嘅表現，久而久之淪為東南亞魚腩都不足為奇，更有機會令印尼缺席所有賽事，包括球會級比賽。
第三受害者就係球迷，印尼擁有大批足球迷，觀看本地足球者亦唔少，但亂局持續，令更多球迷離棄本地足球，幸好盲撐者唔少，但盲撐者終有一日可能改變思想，如果以為仲有一批弱智盲撐者會不離不棄站於你身邊而無視問題，終有一天會得到報應，因為球迷並非全部腦殘。
查實印尼足壇遇到嘅最大問題，係人。人創造之政治滲入足壇內，被政客過分利用，有正義之師試圖驅趕呢班人，但力量太少，而且管理混亂，各派人士我行我素，最後炒埋一碟而死，乜都冇參與嘅球員俾政治俾制度累死，有球員一年冇糧出要去車房打工，有球員因為冇名氣冇糧出兼冇人理，最後病死一角，要死咗至有報導，但不足一週世人就將其拋諸腦後，繼續犯著同樣嘅錯。
我肯定，印尼足球未來十年都唔會有乜大進展，唔係印尼冇好球員，印尼有料球員多的是，大家有眼見，認真搞根本唔會比東南亞一哥泰國差，只不過垃圾管理及政治問題足以令印尼足球即時死亡，因為生計不保，唔少有料球員都放棄足球另覓工作。所謂垃圾管理、垃圾制度、垃圾政治，都係人搞出黎，令印尼足球步入死亡，原來都係所謂熱愛足球嘅人。
PS.雖然QNB聯賽今季暫時停辦，但多支球會依舊保持訓練，包括參加亞協盃嘅萬隆隊及查雅普拉隊。