立即捐款

糖不甩

每次一談及性, 大家都立即臉紅, 一副想說不敢說的樣子。真是太可惜了... 想傾? 就由糖不甩說起吧! 網誌

性別

與Safe Sex Party搞手 Chris對話

與Safe Sex Party搞手 Chris對話
廣告

廣告

你嘅性愛fantasy係咩? 有啲人會想同唔同的人做,有啲人會喺不同嘅地方做愛 。諗下已經覺得自己好壞啦,但其實係香港,係有人可以坦誠咁面對自己嘅需要,同時又用一個好安全嘅方法玩。

有樣嘢,就叫做Safe Sex Party。今期想介紹畀大家識咩係Safe Sex Party,唔係要你認同,唔係要你接受,但,聽下故仔,八掛下都得掛。到底,依樣嘢係咪咁壞?

糖:「點解會想搞sex party?」

Chris:「其實我係有MISSION的,我哋CLUB同其他搞SEX PARTY嘅CLUB 好唔同,係個方針唔同,我哋唔係第一個搞SEX PARTY嘅人,其他SEX PARTY我都去過,佢哋真係為賺錢嘅,但我哋唔係。我就係好想畀啲人試下一啲佢哋可能依一世都冇機會試嘅嘢,我覺得係幾有成功感。因為想啲人可以ENJOY依樣嘢,同玩得開心。有啲人一生人一世都冇咁嘅機會,但佢哋又想。我覺得有MISSION係唔同啲。愈做會愈發覺,香港社會真係好需要(呢樣野),因為係香港依個地方好多人係SEX依方面係唔滿足,依到係一個假開放,真保守嘅地方。其實可以搞個咁嘅CLUB,又照顧到佢哋需要,都幾開心。」

Chris:「你想象中嘅sex party係點伽先?」

糖:「好多人,唔著衫,有好多張床,之後同一時間好多人係到一齊搞,可能會係好多P。好似會有個啲 DISCO嘅燈,好迷幻咁。又可能會有啲表演咁。」

Chris:「其實唔係囉,我哋首先一定會著衫先。同埋咩人就搞咩PARTY啦,我哋好多都係一對一嘅,好少會有多P嘅情況出現,除非佢哋真係自己想。所以我成日都話我哋係SEX PARTY嘅BB班。同埋我哋會有一定嘅燈光,你一定要見到嗰個人咩樣先啦,同埋要睇到點戴套,因為套係好易反轉戴伽嘛,愈薄係愈易戴錯伽!你哋諗個啲只係係AV會出現,因為要有個MOO啲先會想搞!」

糖:「佢哋可以唔搞伽咩?」

Chris:「我唔想啲人覺得我哋係大雜燴,會多一啲私人空間、有多啲房,唔會受其他人影響。 嘩,你諗下你做緊,有其他人喺度望著你,都唔會慣啦,會失準伽嘛。另外都好注重播音樂,因為音樂又好帶動到情緒,好多時都唔會係快歌,而係慢歌,同埋可以蓋過啲人嘅聲呀嘛。其實我哋係SAFE SEX PARTY,咩係PARTY? 即係各適其適,鍾意嚟飲嘢咪飲嘢囉,傾計咪傾計,只係我哋個PARTY係會再深入啲,同埋唔會一嚟就入房搞嘢。對於依樣嘢,其實我哋參加者都係比較慢熱啲,會傾下計呀,睇下啱唔啱FEEL先。」

糖:「但係嚟親嘅人唔係都係為咗SEX先嚟伽咩?」

Chris:「唔係伽!唔會話嚟咗就一定要搞,每個嚟玩嘅人都會有手帶,分三種:紅色係唔可以掂伽,淨係嚟吹水;綠色係可以一對一;橙色,可以錫同有身體接觸,但唔可以性交。去唔一定要有性行為嘅。」

糖:「咁你哋又有幾SAFE先?」

Chris:「咩人搞嘅SEX PARTY就會吸引到啲咩人去。我嘅做法同其他CLUB唔同。但其實一開始唔係咁嘅,都係做落見到有咩需要慢慢改。例如開咗冇耐就開始禁煙,因為係到食煙真係好討厭,咁已經就有一堆人唔嚟。之後又規定要驗血,我哋又會強制用套,女性規定要做抹片檢查。到場後,仲會先沖涼,之後要驗性器官伽!想睇下有冇異味、損傷、紅腫或者增生物。之前都真係試過截著咗D啲人,所以我覺得依個步驟係好難。由於我唔係真係為咗賺錢,希望安全至上。雖然咁會冇咗一班人嚟,但我覺得應該要咁做。其實物以類聚,咩人搞嘅SEX CLUB就會有咩人去啦。好似我哋個ONLINE FORUM咁,雖然係一個SEX PARTY嘅FORUM,但啲人係好文雅,好NICE嘅,係唔會有粗口個啲,甚至啲文章好有意境嘅。」

Chris:「我成日都話我哋係安全過你屋企做伽,講真,男女朋友做個時,肯沖涼先都算係咁啦,我哋依到真係洗得好仔細伽!嗱!你哋平時係屋企點洗伽先?」

糖:「……呀…」

Chris:「哈哈,你哋唔洗宜家答我嘅,男仔其他會易啲,有啲割咗包皮會易洗啲,如果唔係咪反出嚟洗。但女士呢,啱啱嚟個啲呢,好多都係唔識翻開大小陰唇嚟洗,入便真係藏咗好多…便真面有難色 XDDD) 如果我唔係做BODY CHECK依個步驟,哈哈,受惠嘅就係啲男士。」

Chris:「依個係生理上嘅SAFE,同埋我哋會令到佢哋嘅身份都SAFE。要嚟玩一定要揀個網名,唔可以用真名,亦都唔可以私聊。其實另一方面都唔想佢哋私下發展。我成日都覺得勿忘初衷嘛,要記得自己為咩嚟,清清楚楚。我會覺得SEX PARTY係甜品,只係甜品,唔係主菜,千祈唔好將SEX PARTY成為主菜。我諗你都未見過有人開賭嘅,會叫人唔好賭咁多,落細細注就好。我係會主動了解一啲成日嚟嘅人,睇下佢哋點,我會覺得個CLUB咁樣健康啲。」

糖:「依啲咁嘅SEX PARTY一定好多男仔參加啦!」

Chris:「其實我哋有個好得意嘅現象,above average 嘅女性其實比男性多,甚至有啲女士嚟到,你係會覺得,嘩..咁靚嘅。 但係好嘅男仔就真係好難,我哋會有5個評核準則嘅,身高、樣貌、身形、技巧同風度。」

糖:「其實有齊嘅男仔都唔愁有伴,落一落CLUB都搵到,反而女仔就好少去玩,始終過唔到自己個關。而你哋又咁安全,反而係女仔著重啲嘅嘢。」

Chris:「其實因為我哋程序好繁複嘅,又要驗血又要做TEST,又要檢查,如果佢唔係好重視安全依一環都未必嚟,比較錫身,但我自己個人本身唔喜歡光顧性工作者同ONE NIGHT STAND或者用APP,唔係話依件事有問題,而係我個人唔鍾意姐。因為始終唔安全嘛。例如係光顧性工作者,做完之後個人冇咩成長,首先你未必同佢咁多溝通先,同埋佢好似點都會讚你做得好咁,未必可以改善到技巧。另外就係有啲會上網搵SP,但都係好唔安全,我哋有啲會員分享過有人畀人呃又有,畀人偷嘢又有,其實好多情況發生。有啲女士條件真係好好,嚟玩發現佢仲係處女,其實遇唔到就係遇唔到。」

糖:「其實你哋咁重視QUALITY,會唔會令到有好多人冇得玩?」

Chris:「其實咁嘅原因係因為佢哋嚟到可能真係唔會有SEX,一兩次冇SEX都話OK,但如果次次都係咁,得唔到自己想要嘅嘢,嗰個人就會唔開心,對嗰個人都未必好,我做搞手都覺得唔好意思。因為即使係SEX PARTY,都唔會包有SEX,CONSENT係好重要,我哋都唔會話嚟得就一定要做,如果嗰日唔想或者係冇人啱FEEL都可以SAY NO。我都見到依個情況,但又希望可以多啲人參加到,所以宜家分咗兩個組咁去玩,一個組會寬鬆啲。」

Chris:「你哋又會想搞依個網站嘅?」

糖:「會伽,咁多嘢啲人都唔識嘛,又亂咁學,同埋我哋想用個性是自然的嘅手法去講,等大家睇依件事睇得正面啲。」

Chris:「係伽!我會覺得你哋嘅存在係好有需要嘅,但你哋可能係理論性嘅,開解嘅形成,但我哋係實戰嘅,好多嘢冇人教真係唔識伽!!我哋不時都有啲處男處女嚟,可能佢哋都想實戰咁體驗下,但冇一個安全機會去處理依個情緒、需要。初頭真係咩都唔識伽。我哋試過真係有人做緊嘅時候,個女士覺得奇奇怪怪咁,佢問個男仔覺得點,之後個男仔話冇咩感覺,只係下面個到痕痕地,之後發現個男仔都冇入到去,只係係個大髀之間磨。又有試過有啲男士其實係唔識郁,唔知點解成身都好忙嘅,亂咁郁,但條腰冇郁,咁我哋咪教佢囉,同佢講返唔係咁樣嘅,教佢點郁,之後宜家就變咗好受歡迎,改變咗佢。」

糖:「嘩,其實你哋咁多經驗,都可以開班教吓人呀!」

Chris:「唉,處男處女就易教姐,但好多時啲大男人就好難教。好似你哋咁,要幫啲少男少女解決問題其實好易,但如果係成年人,結埋婚,佢哋嘅問題就好難解決。因此未必肯承認自己問題,尤其是男士比較難去接受自己嘅問題,即使有人指出佢嘅問題,佢都會覺得不嬲都係咁,唔去諗個問題,覺得自己唔洗去學,咁先係最大問題。唔知係咪華人社會嘅問題,但男人唔係咁接受其他人依一方面嘅意見。」

糖:「咁你身邊有冇人知道咗你做依樣嘢之後又啲負面嘅反應?」

Chris:「其實又冇喎,咁當然我唔同周圍同人講人或者係去叫人去玩呀咁,因為都想依件事同自己私人生活分開睇咁。通常啲人知道咗都會問,點解你想做呀,想了解下咁。咁我咪同佢哋講囉,講完之後佢哋會覺得都係呀,都啱嘅咁囉,所以都冇咩嘢。」

糖:「咁你之後係咪會做落去呢?」

Chris:「唔係伽,我唔想伽。我成日都想睇下有冇人可以接咗佢,因為真係好辛苦,好多嘢做,例如日常運作呀,搞活動呀咁。同埋其實係好孤獨嘅工作。」

糖:「孤獨? 個種孤獨係點伽呢?」

Chris:「係好多嘢都唔可以同人SHARE,因為都涉及到私隱嘅嘢,有好多嘢都要靠自己決定,同埋有咩事都係要預咗自己頂。好似08年我哋試過有警察查,要搵呀SIR。其實我都幾危險伽,啲人又會好驚身份暴露,但我係低調得嚟又高調,從來都冇CLUB嘅負責人會出嚟做訪問。我做訪問嘅原因其實真係想畀多啲人知道係件咩嘅一回事,畀人知道我哋做嘅係比一般人係屋企做嘅性行為係更加安全,明白我哋背後理念。」

廣告