其實就香蕉奶籌旗出碟嘅事，我認為你支持就捐錢，唔支持就咪鬼理佢，有乜好拗？
不過，我想就「12萬值唔值」呢個問題，補充少少資料。以我理解，呢12萬係用嚟製作佢嗰隻有6首歌嘅 EP，啲錢唔係歌手袋晒，而且好大部份係其他相關嘅工作人員嘅人工（樂手、錄音師、混音師、MV 導演、設計師、印碟廠等，而我假設設佢會搵呢啲專業人員幫佢搞，唔係乜都自己拍心口做晒......）。所以呢個唔係「值唔值」嘅問題，係製作一啲音樂作品同唱片嘅基本成本。
文首圖表係一個我粗略估算嘅 project budget，當中大部份假設係朋友價，唔係市場正價。
一般做碟時間要3個月，咁即係話，當佢真係籌足12萬（亦只得12 萬），佢3個月後嘅收入係$27,500，即係平均每月$9,000多元。
觀察：
一）搞咁多嘢，最終同個普通大學畢業打工仔差唔多，如果佢做律師，見習時應有$15,000，正式執業後應有$40,000；
二）如果搞咁多嘢又抽水又靠乜靠物搏上位，結果都係得返個普通打工仔嘅人工，仲唔做律師，真係幾戇居；
三）當然佢有可能籌多過12萬，但參考同網頁黃靖嘅籌款計劃，係籌到16萬多；
四）可能批評佢嘅人，係好心曲線勸佢做返律師；畢竟，喺香港家吓嘅環境，可能要正義嘅律師多過要正義嘅音樂人。
講到尾，喺香港搞音樂（或創作）條路點都唔好行，可算係唔傻都唔會做；有人肯做，你 li-ke 嘅咪支持吓，唔鐘意嘅咪行開囉，講完。