世界盃外圍賽就黎打，其中中國隊係深圳鬥港隊，香港球迷興奮到出晒水，咁又好難怪，難得作客波擺到咁鬼近打，可能有今生冇來世哦。而都係世界盃外圍賽參加隊伍之一嘅東南亞人口大國印尼就仲未完全決定主場賽事係邊度打，但有機會首次有世界盃外圍賽係巴布亞省打。
根據Bola.net提及，曾經效力格拉斯哥流浪、廣島三箭嘅前荷蘭國腳兼現任印尼國家隊主教練Pieter Huistra(侯斯達)提議，世界盃外圍賽舉行時，印尼隊主場可以嘗試安排於巴布亞省嘅查雅普拉市Mandala Stadium(曼達羅體育場)，即係查雅普拉隊(佩斯普拉)嘅地獄主場。
過往印尼國家足球隊賽事，主要於首都雅加達嘅Gelora Bung Karno Stadium(格羅拉蓬卡諾體育場)上演，卡諾體育場可容納8萬8千人，印尼足協代理秘書長Azwan Karim表示初步計劃中爪哇省梭羅市嘅Manahan Stadium(馬納漢體育場)、斯莱曼市嘅Maguwoharjo Stadium(馬古沃哈喬體育場)及東爪哇Sidoarjo(詩都阿佐)嘅Delta Stadium(德爾塔運動場)會主辦世界盃外圍賽賽事。
如果印尼國家足球隊以Mandala Stadium曼達羅體育場作主場，那麼客隊到達泗水一定要轉機，雖然巴布亞省屬印尼管，但當地位置都算係大洋洲地方，距離大洋洲島國巴布亞新幾內亞城鎮瓦尼莫不遠，當然選擇Mandala Stadium就肯定貪呢個地方比較難去，客隊去到已經冇咗半條人命。
其實印尼有唔少地獄主場可挑選，但交通甚為不便，可能國際足協都唔會批准於國際賽使用，假如台灣隊去查雅普拉鬥印尼隊，相信只係出發個程都有排講。