(下文為本人憶述5月19日當面批評警方的主要內容)
乜督察，我上年五月報警質疑陳鑑林搞嘅龍獅節涉嫌造假，誇大成效呃公帑，你上手拖咗三個月先見我，會面時我詳細講咗我嘅投訴足足近兩個鐘，當時已經清楚要求錄口供，書面紀錄我嘅所有指控，但你哋一直拒絕，上星期仲話查完無證據結案，我覺得警方根本無心查囉。我知，呢啲政治敏感案件，點會係你哋啲中層話事？但你嚟得見我，就係代表警隊，我惟有同你講啦！
你見我同傳媒投訴，而家就話覆核案件，同我錄份口供，睇吓有無新資料，但你草擬份口供只得四段，共十行字，阿乜督察，我諗你知我以前做邊行㗎！一單涉及立法會議員涉嫌嚴重造假，欺騙公帑的案件，你居然寫十行字?咪玩啦！你有無心查，大家心裏有數啦！我簽俾你，咪等你可以話我無新資料提供，咁咪完成覆核，結案了事囉！你覺得我會唔會簽呢？你老遠由灣仔帶埋兩個伙計嚟上水，畀份咁嘅文我，根本係嘥緊大家時間同公帑囉！
係，口供可以「修改、更正、增補」，我都識背啦！但每樣嘢，都有合理範圍，你叫我咁樣補充，我不如自己由頭寫啦！仲有，錄口供係要盡快做嘅，確保投訴人嘅記憶盡量清晰，呢啲錄口供ABC大家都識啦！我已經盡咗市民責任，大半年前向你嘅上手提供資料，宜家隔咗咁耐，你叫我重新再講一次，我點記得清楚呀？對投訴人公唔公道呀？
我知，你係接手做嘅，但你可以睇返啲notes，同上手攞料，寫返份似樣啲嘅口供，唔係咁樣耍我囉！警隊suppose係專業，你哋咁做係丟緊警隊嘅面!單咁嚴重嘅案，你哋咁hea做，對唔對得住市民呀？
恕我直言，我認為你哋一直唔同我錄口供，係怕我嘅口供太辣，令你哋無得自我演繹我嘅指控，唔錄口供，調查就可避重就輕，放生陳鑑林!咩話？唔係咁？咁點解大半年前唔錄，宜家又錄呢？係，我明，上頭無指示點回應，但請你哋記住我以前做邊行！
原文刊在AM730