效力葡萄牙體育會嘅歐陽耀沖終於喺葡萄牙甲組聯賽出場，成個FB都洗Q咗版，冇計啦，事關大家都等咗呢個時候好耐，話晒係第三位香港人於歐洲賽場上登場，即使港人對葡萄牙甲組聯賽並不熟悉。
提到葡萄牙幾個級別聯賽中，過往及現時都有唔少亞洲面孔登場，今年可以見到到日本國腳田中順也、中國小國腳韋世豪、李源一、 伊朗國腳Alireza Haghighi（ 夏基治）、韓國國腳石現俊、仲有鮮為人知嘅中國球員鍾毅、前中國國腳談楊、日本足球浪人廣岡勇輝、澳門小將江大衛等等...
而黎緊南華亞協對手班加羅爾陣中要將Sunil Chhetri（查列），過往都曾經外流葡萄牙甲組聯賽，效力士砵亭B隊，成為首位登陸葡萄牙職業足球賽場嘅印度球員，亦係繼Baichung Bhutia（般迪亞）後另一於歐洲搵食嘅印度球員。
查列曾被某知名足球網站點名為亞洲足球十大新星，雖然有人質疑名大於實，但查列確實於印度內球技係比較出眾，加上知名度較高，早有美國球隊堪薩斯城搵過佢諗住用佢嘅知名度去打入印度市場，最終失敗收場。
往後查列加盟士砵亭B隊，並出場3次，記得首次上場印度媒體爭先報導，但機會始終有限，最後被借返去印度幫邱吉爾兄弟打亞協盃。
查列都黎過香港好幾次，呢位前葡甲兵每到香港都冇乜料到，雖然於印度內球技較出眾，但同師兄般迪亞比，球技及球味都差得遠，睇睇後日呢位尼裔印度兵會否為南華帶黎惡運。我更想睇查列拍擋，大大隻嘅Robin Singh（羅百成），印度版羅大俠呀！