立即捐款

馬克鍾

八十後廢青,現職白領。深信溝通、思考與閱讀才能在荒謬的社會中保持清醒。 網誌

政經

袋住先──懲教篇

袋住先──懲教篇
廣告

廣告

袋住先──懲教篇

(內含粗口,不喜勿閱;如有雷同,實屬不幸)

我叫阿港,行年四十七,中五畢業去工廠捱咗幾年之後就走去考懲教做白板仔。想當年我一條老散已經帶住百尻幾人一個期數,監房三日唔埋兩日就打大板交,真係監獄風雲一樣。以前就無咁多規矩,唔使寫咁多薯仔文,又無咁多鏡頭,管班犯都方便啲。唔似得依家,樣樣都話要程序程序,班犯郁啲又話同太平紳士或者申訴專員投訴。不過,捱咗差唔多三十年總算平平安安,升咗級做沙展,心口個老人牌又差唔多有三粒星,叫做對得住關二哥同老祖宗啦。

份屬左班嘅我今晚返夜頭更,返到環頭就同右班啲師兄弟交更。今晚個兩粒一辦(值夜官)係阿國,我睇佢唔順超好耐,成日篤班細嘅出嚟揹鑊,好多師兄弟背後都叫佢做火箭國。做野又唔跟規矩,想點就點。係呀,以前無咁多規矩,但監房係有套運作嘅法則,呢度講嘅唔係白紙黑字嘅規矩,係約定俗成嘅文化。不過我都係條老油條,咩風浪未見過丫,煮到埋嚟咪食!

到鎖倉時間,岩岩鎖完我個倉,本來都以為馬照跑舞照跳,但隔離倉嘅犯唔知做乜撚同其他犯嘈起上嚟,好在有師兄撳得住,帶咗個犯落三手房搞。心諗,好在唔係我呢期,雖然佢地係黑手,但總有幾個搞屎棍撩事鬥飛,有起事上嚟真係麻撚煩。

都已經畫定個鐘預備夜啲篤鐘做記錄,阿國帶住兩個師兄夾咗個犯嚟我期數,原來係頭先嘈果個犯。

「鍾SIR,有咩關照先?」
「拿,阿港,岩岩佢落到三手房已經係咁沙冧認錯知衰,仲話唔會再嘈,不過廢事出事,所以佢都係唔好返原本個倉,今晚佢就過你期數訓住先,拍硬檔好似政府咁講袋住先。」
「鍾SIR,個風化犯見晒報架喎,擺佢過嚟你想佢畀班犯玩死定我死呀?」
「擺一晚啫邊有咁易死呀?」
「水記呢?有位咪擺住上去先囉!水記守尾門丫嘛!」
「阿港,你唔好推三推四啦,有犯嚟你就接,我係今晚嘅值夜官,我話擺邊就擺邊,你依家係咪disobey order?係咪同泛民班爛癱一樣逆阿爺意呀!」

呢一刻,我竟然有同泛民同一陣線嘅感覺。屌,咪將我同班爛癱比!假假地我都係紀律部隊執行正義!

爆咗骨,個犯就好似隻入咗狼群嘅羊一樣身處險境。雖然如果要同佢撐,我都未必會輸,不過今晚就讓你一步,就硬食呢一更!下次先再同你慢慢玩!

準時十點熄燈,班犯都陸續訓覺,較定鬧鐘,響就篤鐘。但平日嘅習慣始終改唔到,就係會恰住等鬧鐘響先郁。呢一覺,真係恰得太長,鬧鐘無響,直到一點,好日都唔辣更嘅阿國嚟辣更先知出事。

個犯畀其他犯虐待,送咗去瑪麗,最後傷重不治;而我,亦因為疏忽職守被革職。新四座無得再住,長糧又無埋,本來風風光光,一下子就無晒。我同老婆捱都無所謂,但一對仔女無瓦遮頭,我真係好心痛。好後悔點解當初無拒絕阿國或者叫佢帶個犯去水記。明知會出事,點解我仲咁自信覺得唔會有意外?點解畀佢激一激就會袋住先?

俱往矣……

廣告