立即捐款

馬克鍾

八十後廢青,現職白領。深信溝通、思考與閱讀才能在荒謬的社會中保持清醒。 網誌

政經

袋住先──公廁篇

袋住先──公廁篇
廣告

廣告

袋住先──公廁篇

(本故事純屬虛構,如有雷同,實屬不幸)

我叫Sean,三十而立。廿一歲時喺Poly Financial Services畢業後,戇框框嘅我以為可以入I-Bank做嘢,結果只係去咗間保險公司度做Management Trainee。即係咩?咪即係Sale。唉,唔L驚,憑住我英偉嘅外表同出眾嘅口才,早喺譚校長永恆嘅年紀已經踏上百萬圓桌之路。舊年仲踏入戀愛嘅墳墓,喺大埔林村用六成按揭買咗間補咗地價,價值五百萬個大洋嘅新淨丁屋。雖然都仲係用架前七代步,不過四仔之中已經有三仔,依家每晚我都好努力咁向第四仔衝刺。

近排留名偉講咩月入萬五儲三千,睇少啲戲唔好去日本就可以上到車,我唔知佢講嘅係上到架前七定係Giant,但我真金白銀用咗兩球去買樓,如果月儲三千,要儲五十幾年先儲到。笑完留名偉離地到咁,年青有為而毫不離地嘅我仍然要跑數嘅,唔使食唔使痾咩?不過講起痾,真係慶過火屎。

是咁的,屋企隔離個空地最近起咗間公廁,我話晒都係金融才俊,我都明白人口密度去到一定數量政府係要提供公廁嘅,但係,你都唔好整個旱廁喺度丫!作為資本主義嘅典範,世間文明嘅城市,水貨客嘅天堂,依家仲起旱廁,真係震驚十三億人,結局令人淚崩!Sorry,嚴重咗。香港依家係仲有五十幾個旱廁,但呢度係林村,隔離就係大路,有乜理由係旱廁?為咗一睹旱廁嘅風采,我同老婆各自前去男女廁實地考察一番。呢個廁,唔止係旱,仲要無廁紙供應!如果一個唔覺意,入去痾住先,真係一失足成千古恨!

就係咁,我同食環投訴過,成個月先覆,又係啲行貨對答,「多謝你於某日的來信…根據...提供公共廁所…責成承辦商…」,即係唔關佢事,拖住先。作為專業嘅銷售人員,當然唔會坐以待斃等運到,所以我主動出擊搵埋區議員同村代表幫手。不過佢地都係Hea住先,一來呢個區議員已經連任多屆,鐵票走唔甩;二來我唔係原居民,村代表睬我都生臭狐,咪又係叫我袋住先。

自己屋企自己救,即係俗語話求人不如求己。一有假期我就係村口派傳單,搞簽名活動,叫村民支持正視問題。有次有個阿嬋走嚟問我,簽名有無蠔油派?我話無,但關乎村內衛生同村民健康,叫佢簽個名支持,佢大大聲話阿張融搞簽名都有蠔油派啦,跟住一個華麗轉身大叫2017一定要得就走咗。我望唔透,點解衛生同健康,都唔夠一支蠔油重要。

Once again,作為專業嘅銷售人員,我好明瞭接觸到100個客人先有1個真係會落搭嘅道理。繼續搞簽名派傳單,又有個阿伯路過,以為我係佔中啲人,企係度指住我嚟鬧鬧鬧,我未開口佢就「你老母,你老母!」我都好想好似譚耀宗咁報警等重案組跟進,但我唔想搞大件事,而且佢無加上動詞,又點算粗口呢?Any肥,佢繼續鬧,仲話「你肚痛要去廁所,有得痾無廁紙你痾唔痾?有公廁你就感恩啦!」聽到呢度我終於忍唔住,好似局長咁大叫一聲,睇L住呀!係「你聽我講」先啱。嚇到佢成個人硬晒呔,機會瞬間即逝,用我嘅三吋不爛之舌機關槍式掃射:「阿伯!你估呢度係你以前住嘅農村咩?感恩?一個唔乎合文明國度嘅產物,點解我要感恩?咁不如用返水壺電話,用返Call機啦!你手上面部電話都係小米啦,你出入都搭巴士啦,你食米都係華潤超市買啦,你件衫心口個牌子都係喬丹,對鞋係New Barlun啦!點解唔用人力車點解唔自己種米點解唔自己造衫點解唔好似劉備咁織草鞋著呀?」最後,霸氣咁加多句「講完!」我覺得自己真係有做局長嘅潛質。我平時都唔係咁嘅,唔好意思。

香港人就係咁,各家自掃門前雪。最後我忍無可忍,整咗幾塊「我要真普選」Banner,夜晚掛咗條係公廁外面,第二朝就見到食環嘅人嚟清,快過處理我封投訴信多多聲!就係知道好快有人拆,未用嘅Banner就隔一排掛一條,掛多幾次,食環直頭學立法會起圍板咁封咗個廁所!一天都光晒!唔好話我搞到人地無公廁用,第一,呢個係無廁紙嘅旱廁,對環境衛生好有影響,而且好唔文明囉;第二,已經同食環區議員村代表反映過,仲搞埋簽名政府都無動於衷;第三,個公廁唔係我封,落圍板嘅係政府。痾住先?你痾埋我果份!去第三世界痾啦你!

我要真……公廁!

廣告