早排新加坡12獅擊敗士氣一般嘅吉蘭丹拎咗馬來西亞足總盃冠軍，係第一次有外地球隊奪得馬來西亞足總盃冠軍。
由於新加坡自家製嘅S.League聯賽發展受限，2012年起主要以23歲以下球員組成嘅12獅決定參加馬來西亞超級足球聯賽，係自94年離開馬來西亞聯賽後在次重返。
由於馬來西亞聯賽競爭力較大，最初12獅出現吸引咗唔少新加坡球迷入場關注，主場看台都幾乎坐到爆滿，即使今日入座率不如最初，但有唔少新加坡球迷一直當12獅係國家隊咁睇，所以依然有一定吸引力。
雖然由主要以23歲以下球員組成嘅12獅喺馬來西亞超級足球聯賽有唔錯嘅成積，但亦有新加坡球迷不滿新加坡足總重視12獅而半放棄自家製聯賽S.League，雖然S.League欠缺競爭力，但S.League始終屬於新加坡，睇見S.League變成老將及2線3線球員嘅世界，喺亞協盃由實力分子變成魚腩，作為外地球迷我都覺得好可惜，仲記得10年前聽到香港球隊喺亞協盃抽中同新加坡球隊一組，香港球迷都會心諗「仆街喇呢次」，但10年後香港球隊喺亞協盃抽中同新加坡球隊一組，香港球迷卻心諗「仆你個街又送6分喇喂」。
可能香港球隊都有唔少進步，但新加坡球隊退步就更明顯喇。我自己都唔敢話12獅之成立對新加坡足球有冇大幫助，12獅同S.League表面可以並存，但S.League都要靠熱心人士幫忙至可勉強企穩，究竟拎馬來西亞聯賽冠軍重要定亞冠附加賽出線重要啲呢？
就喺幾年前，武裝部隊於亞冠附加賽大炒印尼棉蘭隊4蛋，幾年後武裝部隊改名成「勇士」，卻以6球不敵只派1名外援上場嘅查雅普拉，過往新加坡足球認真起上黎對住印尼間中都羸到，今日雙方水平事實唔係差好遠，但新加坡精英都喺晒12獅咁滯了，亞協盃就唔夠精英幫拖，好外援又畀鄰國掘走，預測新加坡球隊未來2年依然會扮演亞協盃魚腩呢個角色。