是咁的，話說我以前好鐘意放學就去街市買碗豆腐花返屋企食，有時侯仲會雪凍佢，一路睇住數碼暴龍一路享受碗豆腐花，久而久之食豆腐花食到上哂癮。
直到有一日放學返到屋企，老母笑笑口好溫柔咁同我講：「睇下雪櫃，我岩岩經過惠康買咗盒豆腐花比你食。」
我好開心咁衝入廚房打開雪櫃，見到盒豆腐花，就好開心咁多謝老母。
當我睇住數碼暴龍準備食呢淡豆腐花時，一食落口，心諗：「咦！咁撚淡嘅？」
我就好奇問我老母:「點解呢盒豆腐花咁淡嘅？陣味怪怪地咁。」
老母喺廚房到拎咗啲黃糖出嚟，話落咗佢會甜返啲。
落完之後，陣味真係怪怪地，唔通包裝嘅豆腐花同街市買嘅相差咁遠？
之後我抱有懷疑睇清楚包裝紙，一睇之下！
原來盒豆腐係蒸煮滑豆腐！根本唔係就咁拎嚟食！
我望住盒「豆腐花」，再望一望我老母，佢似乎覺得呢下買比我食嘅舉動相當滿意，不時流露出好媽媽的笑容。如果我同佢呢盒豆腐係要蒸煮嚟食，我估佢會好失望。
但老老實實，真係好難頂，於是我提出「真係好淡，呢個好似係蒸煮豆腐」，我老母直頭拎咗裝黃糖嘅盒，邊落住黃糖邊溫柔地說：「淡就落多啲啦。」
最後，我唯有含淚將呢盒蒸煮滑豆腐，活生生咁食咗落肚。
自此之後，我再無喺佢面前買豆腐花嚟食了。
