政經

湯家驊, 真係民主同路人?

廣告
湯家驊, 真係民主同路人?

廣告

湯家驊終於退出公民黨,大家都唔覺得詫異。但係佢無端端連立法會議員都提早唔做,真係要人唔懷疑佢已經比中共收買或者有痛腳俾人捉住都唔得。

人人都知泛民同保皇(叔)奴才喺立會地區分組議席數目係18:17,湯渣無啦啦唔撈,由辭職到補選有幾個月空窗期,即刻變咗17:17 (包埋曾鈺成);奴才黨絕對可以提出一啲本來唔會係分組點票過到嘅議案,例如杜絕拉布嘅議事規則,而曾鈺成喺呢個時候絕對可以阿爺一聲令下就投票支持。就算比泛民捱到補選,以佢哋係新界東一向都係得50%多少少票嘅往績,喺而家泛民同本土誓不兩立嘅情況下,絕對有可能輸俾奴才黨協調之下派出嚟嘅候選人(豬都可以)。仲有,中共好可能一早已經喺新界東大肆種票,去準備下年立會選舉,甚至係呢場補選。講真,大埔上水咁多村屋,又係鄉議局嗰地頭,唔使等埋發叔都可以求其加多一百幾十戶空中樓閣啦。

以上嘅分析,我諗湯渣無可能諗唔到,如果佢真係只係意見不合退黨,無痛腳,無投共,我諗唔到任何原因佢要得返一年都唔撈。我哋冇辦法知道湯渣提早退出立會係唔係阿爺一早安排好嘅劇本,定係本來等佢做完今屆 ; 點知保皇奴才做出驚世大柒事,中共同啲奴才都可能覺得要轉移吓視線。所以,湯渣絕對有機會喺中共威逼利誘之下,提早收檔。

湯渣話搞個「民主思路」,要走中間路線,同中共有商有量,講到尾,咪又係謝偉俊嗰啲假中立,真投共。經過咗三十幾年嘅民主回歸失敗,有少少歷史知識嘅人都知道獨裁者好似蘇共,赤柬只會差唔多倒台嘅時候同你有商有量。中國五千年天朝政制,邊有皇帝會同你有商有量,比多啲自由你?公民黨話湯渣係民主同路人,希望你哋只係講下客氣說話,唔好再做真心膠,誤導選民。

原文刊於本土文集

Cover photo: 蘋果日報

廣告