鍾唔鍾意一個球員真係好講感覺，有時佢唔洗做啲乜你都會被佢吸引住；有時佢就算乜都無做過你都會睇佢唔順眼；亦有時候你初初好睇佢唔順眼，但當了解過佢背景之後，你卻會慢慢欣賞佢，甚至鍾意咗佢，岡崎慎司就係其中一位我由討厭變到鍾意嘅球員。
2010年世界盃時期嘅日本真係唔多外流球員，23人之中得4個留洋，最出名個個已經數到係本田圭佑或者內田篤仁，但陣中亦有唔少係國內出名嘅球員，例如日本派路遠藤保仁，西利哥中澤佑二，仲有經典十號中村俊輔等等，而個陣時岡崎慎司先得個24歲，仲踢緊J聯賽嘅清水心跳。
其實我唔係幾鍾意岡田武史時期嘅日本隊，因為佢幾乎係玩緊勝利十一人，場場都係排個個陣，場場都係用個班人，睇佢換人就更加死，第一個換人一定係換松井大輔，情況同普度眾生係阿仙奴一樣。當時正選前鋒係大久保屋企人，岡崎慎司都係後備前鋒，頭三輪都係。
點解個陣時唔鍾意佢？原因好簡單，因為我鍾意日本朗拿度森本貴幸。當年森本貴幸踢緊意甲卡坦尼亞，亦係留洋球員其中之一，知名度都唔算低，但偏偏岡田武史就唔太重用森本貴幸。記得分組賽對荷蘭，落後緊0：1，我好期待佢換入森本貴幸，點知到換人個陣佢竟然係換入岡崎慎司同玉田圭司，我仲好記得我係FACEBOOK打左句：「我唔係要兩舊司啊！我要森本貴幸啊！」最後，森本貴幸就無啦，最記得只係岡崎慎司點樣面對住門將情況下，大腳西走咗個波去觀眾席。
最後，日本於16強止步，岡崎慎司總共入咗一球，但個一球絕大功勞屬於精彩扭過兩名丹麥後衛再橫傳俾在門前嘅岡崎，佢只係做咗最簡單一腳埋門功夫而已。
世界盃過後，偶爾在YOUTUBE睇到段片關於岡崎慎司，係講佢世界盃時期嘅生活。原來個陣佢老婆生咗個仔無耐，咁岩撞正世界盃時期，佢係場上心神恍惚，其實係掛住家中愛妻同愛子，球迷話。岡崎慎司絕對唔係靚仔，尤其佢對朦豬眼，加埋個軍人頭，得罪講句，其實唔太順眼，但係當我係片入面睇到佢抱住自己個仔時候，佢竟然係可以好溫柔，望住個仔已經可以令佢笑到好窩心。一個男人，係場上打生打死，落到場幾兇狠，尤其岡崎慎司係個啲拚命三郎，其實係嘅都係頭家，做完成日野已經好累，但見到自己個寶貝仔，幾辛苦都好都要抱下攬下，頓覺立刻充滿力量，就係佢抱住個仔含情默默個個樣令我對佢開始改觀。
下，佢抱個仔都可以令你改觀？鍾唔鍾意一個人真係好講感覺。而個陣我對佢就係有一種好嘅感覺。
世界盃後，岡崎慎司衝出日本，轉會到史特加。初初係史特加唔係正選，仲要唔知去到幾多場之後先射入自己德甲第一球。第二季開始上力，都叫做有正選，但佢唔係高產射手，3季入波加埋都係得12球，但佢嘅跑動，佢嘅勤力就真係世界級，無波在腳佢都可以同你鬥搶鬥走，絕對係一位超級勤力嘅球員。
唔好波唔緊要，用後天嘅努力去搭救一樣可以成為出色嘅球員！正正因為呢份努力，絕對係會令好多曾經睇少佢嘅人另眼相看，至少人地係實實在在地努力向上，個份奮鬥心比球技來得更重要。
佢係史特加入波真係唔多，但你又點估到佢第一季加盟緬恩斯就入咗15球，仲多過係史特加個3年，呢15球亦刷新咗日本球員效力五大聯賽嘅單賽季聯賽入球紀錄，算係威水架啦。之後個季仲勁，開季7場入6球，一度領先射手榜之位，不過後來墮墮地皮，成季埋單入咗12球，算係唔錯啦，一球12碼都無喎。所以話一個球員轉會之後就係一個新開始，話之你轉會之前幾廢都好，無人會再在意你之前係點，一切都會重新開始。
不過講到最威水，始終都係係國家隊。上陣93次，超越咗有不死傳說嘅前輩三浦之良，而入波數字達43球，為日本國家隊史上第3位入波多球員。雖然距離排第一嘅釜本邦茂仲差成37球，但佢而家先得個29歲，大把世界啦！做唔到第一，咪睇下超唔超越到前輩三浦之良嘅55球囉（乜咁岩，又係你呀三浦之良？）。
係德國打滾4年，終於有機會衝出德國，黎到最刺激嘅英超聯賽。雖然只係效力李斯特城，唔係咩大球會，但有英超球員賞識，對亞洲人黎講已經係一份光榮。希望岡崎慎司可以好似阿仙奴前球星龍格堡咁拚命，做另一個拚命三郎！
奸爸爹，Okazaki ！！
BTW，佢對朦豬眼睇下睇下又幾可愛。GAY。