菲律賓國家足球隊於2018年世界盃資格賽亞洲區第二圈先羸巴林後羸也門取得兩連勝，儘管巴林足球現時到達一個青黃不接之時期，但球迷們仲係對菲律賓能夠打羸巴林感到意外，但如果大家睇睇其國家隊名單可能就會明白點解架喇，現時效力河南建業嘅柏天奴、林志堅嘅師兄舒洛克等都返黎助陣，而且陸續有新血統歸化球員加入，包括於阿聯酋出身之前英格蘭U18國腳Luke Woodland(禾蘭迪)、前奧地利U19國腳Stephan Palla(柏拿)、前墨爾本城球員Iain Ramsay(蘭西)及德國出身嘅Kevin Ingreso(奇雲恩格利素)，仲有10多名來自五湖四海嘅血統球員正在考慮或已申請歸化菲律賓，人腳方面肯定唔會有問題，而且搵到嘅愈黎愈有級數。
雖然菲律賓不斷有新歸化球員加入增強實力，但青年隊出到去就輸多羸少，冇計，青年隊大部分起用菲律賓土生土長球員，冇歸化球員協助質素有限，就如早前東南亞運動會，菲律賓U23派土生土長球員參加足球項目，結果4戰全敗，柬埔寨都唔夠打，論A隊實力，菲律賓可稱作東南亞新興勁旅，但青年隊則仲係魚腩水平，菲律賓U23今年打過嘅所有賽事全部輸光。
今日菲律賓足協行嘅路，明顯半放棄青年訓練，主力為A隊尋找海外血統球員去提升實力，即使有菲律賓血統嘅海外球員人數多如牛毛，但只要有一日菲律賓停止尋找海外血統球員，菲律賓足球就會分分鐘玩完，返到去10年前之景貌，連柬埔寨都末必夠打，等同港隊如果只用土砲打馬爾代夫，輸埋唔出奇。
話時話，前英格蘭U18國腳Luke Woodland(禾蘭迪)爸爸應該就係於足總統籌港超嘅Paul Woodland。