日前（2015年6月25日），「方向報」分批爆出 6.18 香港政改表決甩轆嘅建制派 whatsapp chat group 討論記錄之後，即日有人留意到有議員紛紛即 "join telegram"。如果諗著轉用 telegram 就可避免洩密，真係令人笑咗。
情報收集方法大緻分為 human intelligence （人因情報） 同 signal intelligence （訊號情報），今次洩露完整對話記錄似屬人因情報。用幾安全嘅app／加密技術都係嘥心機，缺口根本唔係嚟自訊號情報。
的確， whatsapp 初推出時，對話傳送內容用 plain text 轉送（即冇加密），即係好容易俾網絡「中間人」截取。但其實，經我翻查 whatsapp 官方公佈文件同埋我自己做實驗截取 whatsapp 同 server 通訊證實，依加 whatsapp 已改用加密渠道傳輸資料。
雖然 telegram 有「閱後即焚」功能同埋 end-to-end （用戶端對用戶端）加密功能（中間交換 server 只會交換加密咗嘅資料，telegram 服務提供者唔駛、唔會亦唔可能將對話內容解密），但呢兩個功能只可以喺單對單（兩個人）對話入面開啟，群組話對話係冇 end-to-end 加密功能，換句話講，如果一群人用 telegram 開 group chat，根本用唔到 telegram 最重要嘅加密功能，安全程度亦應該同用 whatsapp 差唔多。
作為一個喺澳門長期受監視嘅人物，上年抵擋過澳門政府濫權、千方百計奪取由我控制嘅民間公投投票者資料庫，我嘅經驗係，當時民間公投網站俾喺6.22港大民間全民投票大敗中共網軍嘅 CloudFlare 保護，加上其他暫不可透露嘅保安措施，中國、澳門政府都冇用電腦技術層面攻擊，而選擇咗用法律責任對我進行威嚇。而我最後有效頂著打壓嘅方法係，寫個「dead men's control」，即係，假設即使出現咗最差情況（worst case scenario）- 例如我被殺或長期拘禁，民間公投網站都會自動公佈結果同刪除投票人資料。最終，澳門民間公投透過網站順利進行同埋公佈結果，崔世安獲近八千張不信任票。
雖然電腦唔可以同人類做類比，但實務上我認為，一條 well-tested 嘅程式，可靠度同忠誠度肯肯定比人類高。而中國政府／中聯辦當然想啲建制派議員係乖乖地執行指令嘅機器，夠鐘就埋位投票，叫你內部通訊要守密就絕對保密，叫你停止爭拗就即刻停火，最緊要係，唔會有「私心」攞啲 chat log 去曝料嚟卸責或攻奸...
最後，希望香港建制派順利捉鬼，俾我哋繼續有花生食。
原載2015年6月26日《立場新聞》