大家平時出街玩或者返工路上可以留意下到底香港仲有幾多個人會拎住本書出街睇，我相信如果你見到有三個已經好難得。香港被視為文化沙漠唔係冇原因，除左政府對文化藝術既漠視之外，香港人本身對文化都冇咩興趣。一個藝術家係香港突然興起的話係潮流因素，唔係因為大家真係對佢既作品有咩興趣同了解。明明肚裡毫無半點墨水，點解又要做個偽文青呢？
照我係網上面搵到既偽文青特徵，佢地口中最愛既作家不外符村上春樹（唔係高登果位向西）同芥川龍之介，但到底有幾多人真係睇過同睇得明呢？我唔知道。另外星巴克亦都係佢地指定既文藝點。買一杯咖啡加多個麵包，係旁邊再不經意咁放一本玄鶴山房然後影張相放上網就係一個偽文青既目標。佢地想話比人知自己幾咁有品味，當大家放假既下午只係識得行商場買衫買鞋既時候，佢就係咖啡室一角靜靜咁睇住日本文學大師既著作去了解依個世界既醜惡。但問題係一個鍾意睇書既人應該唔會花半個鐘既時間去等一個位黎睇書，而有位坐低之後更加唔會浪費咁多時間同你擺陣影相，就憑你擺陣既時間人地就可能夠時間睇完個序。睇書從來係個人享受，四處話比人知你睇緊書依種事都係小做為妙。
除左態度，唔知幾時文青都有左一套制服：一定要方大同頭加黑框眼鏡再配針織冷衫同淨色ＴＥＥ下身就窄腳加ＡＬＬ ＳＴＡＲ鞋。如果咁著完就係文青，個個著件醫生袍就係醫生啦，仲洗乜咁辛苦讀咁多書？係你努力將你既外形變到同個文青一樣既時候，你跟本就冇果種文藝既氣色；影完相本書睇唔夠十分鐘就放低去轉珠、成三十二三度你既文青裝仍然係要加件冷衫、拎住包煙話係文青標誌但明明你中學做ＭＫ仔果陣已經食緊。或者用黎呃一兩個後生妹覺得你好有書卷味都可以，但萬一去手作市集或者真係係咖啡廳撞到一班真文青既話，你就會發現一個文藝人根本唔會著一件千幾蚊既淨色ＴＥＥ，更加唔會理個頭係點樣，人地帶眼鏡都只係成日睇書先搞到有近視。
計我話如果你係跟潮流既話就算啦，反正你夜晚去蒲又唔會玩文青ＬＯＯＫ，扮文青拎住本書拎住部單反周街去係而家既溫度黎講直頭係受罪。鍾意睇書咪係屋企睇，好地地唔開半日ＦＡＣＥＢＯＯＫ睇下書冇壞既。過多排日子有功，到時你係話題同學識方面都多左，大家自然會讀你有見識啦。冷衫？黑框？仲ＷＨＯ ＦＵＣＫＩＮＧ ＣＡＲＥ咩。
一個讚好，是對我的一點支持。
如果想分享給其他朋友的話，請標明出處並附上專頁網址。
https://www.facebook.com/MaoYanDe