印度北部喜馬偕爾邦（Himachal Pradesh）坎格拉（Kangra）縣嘅首府 Dharamshala（達蘭薩拉）本來只係一個非常平凡兼寂寂無名嘅城鎮，但由十四世達賴喇嘛逃出中國流亡印度後，達蘭薩拉就成為西藏流亡政府政治中心，達蘭薩拉就變成國際社會經常提及嘅名字，更成為印北旅遊熱點。
國際間每每有達蘭薩拉嘅新聞出現只要都係同旅遊、人權、達賴、西藏獨立有關，近日達蘭薩拉再度成為國際焦點，今次唔係政治問題而係同足球運動有關。
最近達蘭薩拉捲起一股足球狂熟，因為第21屆嘉榮千莫紀念金盃足球錦標賽（或稱國母盃）（GCMGC）正式展開，今次錦標賽有來自達蘭薩拉、印度東北、南部、西部、尼泊爾、美國、加拿大等50多支業餘球隊參與，大部分球員都係藏人。
呢個業餘足球盃賽本為紀念達賴喇嘛尊者已故母親Gyalyum Chenmo（嘉榮千莫）而舉行，現時已經變成流亡藏人足球界盛事，亦係各地藏人交流之好時機，參賽球員主要為流亡海外嘅藏人，舉行地點位於達蘭薩拉西藏兒童村（TCV）學校，最終於4,000觀眾見証下，總決賽由印南球隊Mundgod FC（蒙果FC）以2比1擊敗上屆冠軍，來自尼泊爾嘅Tashiling Potala FC（達西林布達拉FC）。
蒙果FC來自印度南部卡納塔克邦蒙果，蒙果係南印最多藏人聚居地方，大部分都係從上世紀由中國西藏流亡過黎，今日佢地後代於蒙果出生，即使活於印度，板球熱卻冇影響後代藏人，後代藏人最熱愛嘅運動始終都係足球，於是乎一班藏人業餘足球員就組成蒙果FC，一支代表南印藏人嘅足球隊。
提到西藏足球，由西藏流亡足協建立嘅西藏流亡國家足球隊參加2006年世界野盃（國際足球獨立體聯合會（FIFI）主辦）後就甚少露面。唔少國家拒與西藏流亡國家足球隊接觸交流，因為怕惹起政治問題，相關事件包括2007年印度23歲以下國家足球隊因中國政府極力反對而取消與西藏流亡國家足球隊友賽，只有不丹國家足球隊夠膽無視他國政治要求同西藏流亡國家足球隊進行交流及友賽。
因為大部分居於印度嘅藏人以難民身分生活，所以不被國際承認，球員冇可能以西藏球員身分出外踢波，流亡藏人要做職業足球員，只有一條路，就係申請做印度或當地公民，放棄流亡身分做印度人或尼泊爾，在以印度人尼泊爾球員身分出外。就印度而言，1986年推出嘅印度公民法案允許1950年至1987年間出生印度嘅藏人申請印度國籍，1987年以後出生嘅藏人只要父母一方係印度公民都可以申請。可以申請印度國籍嘅藏人唔少，但即使願意都未必可以申請到。
現已退役嘅前尼泊爾國家足球隊後衛Tashi Tsering（扎西次仁）就係少數獲得身分嘅藏人足球員，生於加德滿都嘅佢，家族於上世紀由中國西藏流亡到尼泊爾，係少數取得尼泊爾國籍嘅流亡藏人，球員時代效力Manang Marshyangdi（瑪朗馬沙陽蒂）時曾被西藏流亡足協邀請短暫代表西藏流亡國家足球隊，成為西藏流亡國家足球隊隊中唯一職業足球員，但卻引起爭議，最終尼泊爾一方禁止扎西次仁代表西藏出賽。
因阻力多，西藏流亡足球發展困難，球員身分問題無法參加大部分有關印度、尼泊爾嘅職業／業餘足球聯賽，但慶幸獲前印度國腳Baichung Bhutia（般迪亞）支援，般迪亞係印度足球近代史中最有影響力嘅足球員，生於錫金嘅佢本為當地藏人，或者係自己友關係，般迪亞退役後將有潛質嘅西藏年青球員帶到去錫金踢錫金足球聯賽（錫金聯賽冇限制冇國籍嘅藏人球員上場），亦為西藏流亡足協提供經費開支。
不過多番支援西藏流亡足球後，般迪亞開始被印度某些人士排斥，亦因為建設錫金足球及協助西藏流亡足球發展冇任何經濟回報令般迪亞損手爛腳，其職業足球隊United Sikkim（錫金聯）宣佈破產，錫金聯賽亦失去西藏流亡球員身影，但今日般迪亞依然有支援西藏流亡足球，今次國母盃，佢就有分主持開幕禮。
對於西藏（流亡）足球未來，各界仲係感覺唔到有希望，因為國際間不承認其地位，完全被孤立下，生存都成問題，仲邊有希望？