望一望ＦＡＣＥＢＯＯＫ，依頭有「東北村民於新城市商場默站抗逼遷」、果邊有「逾百港大校友留守抗議」、仲有鉛水事件全城網民鬧爆。依幾件事有乜共通點？首先係受害者都好落力企哂出黎，其次就係佢地真係得個企字。係香港依種地方想企出黎扮可憐係冇用的，要其它唔關事既市民同情你？佢地寧願行下街或者食串魚蛋。媒體對你既關注亦都有好大既時間性，好似港大副校長件事，你最聚集到鎂光燈就係你包圍佢同交信果一下。其它時間係到企？唔好意思，去趕下一單新聞先。梁振英政府最令筆者醒覺既一件事就係：係香港你要人怕你，你要人聽你講野，首先你要夠暴力。
咩叫暴力呢？唔係叫你揪開緊會班人黎打佢一身，更加唔係叫你一刀切左蔣麗芸個頭落黎（雖然好多人都想佢有咁既下場），而係要比到你唔滿意果班人一個信息：你地係黎真既。諗下香港慣用既爭取模式：遊行、叫口號、到目的地、遞交請願信、影相、完。夠和平理性，但久而久之我係政府都覺得唔洗聽你講野啦。如果你細個果陣阿媽淨係會一味叫你「做功課，溫書啦」但從來唔發脾氣唔打人唔熜左部電視唔比你睇既話你會唔會乖乖地去做？政府緊係想市民和平，就好似細路永遠想啊媽唔打佢一樣，就算佢做錯事都好。而家既政府明顯係漠視民意，你講佢唔鍾意就唔聽。就算你七一有五百萬人上街都好，我唔覺得梁振英會因為有五百萬人出黎散步就覺得驚。佢驚既係咩？佔領囉，好似金鐘咁，當一班學生衝出馬路，梁振英之後所做既一連串行動先表演到佢驚既心情。佢驚既係市民唔再只係乖乖地企係鬧鬧完就算，而係大家明白到講係冇用依個道理之後會有佢地口中更加「激進」行為。
當一種模式唔ＷＯＲＫ，好自然就要試另一種方法。有人受軟唔受硬，但好明顯有人都係唔打唔知驚。其實港大班人算叻啦，起碼都仲識圍住人地，算係更進取既一種手段。我成日聽到人講唔一定要咁激進，實有其他方法之類，可能佢啱，可能有其他方法解決到，但好明顯再激啲就係其中一種有用既手段。做啊媽既可以語重心長講道理去教個仔又或者比時間佢等佢知錯，但如果個仔係梁振英的話，我諗都係拎支雞毛掃追住佢個屎忽黎打依種方法比較實際。
一個讚好，是對我的一點支持。
如果想分享給其他朋友的話，請標明出處並附上專頁網址。
https://www.facebook.com/MaoYanDe