香港人遇見大陸自由行，兩人談起香港在這個漫長七月發生的荒謬事。
自由行：「比我都唔會係香港住，地方又迫，樓價又貴，一有新樓盤開，唔講以為係制水，全部人一窩蜂去搶，抽中好似以為中左六合彩，大佬，幾百萬既樓，宜家你地大學畢業生都係搵得個萬幾蚊，唔食唔著唔去日本旅行唔去戲院睇戲，都要供30年。」
「香港樓雖然貴，但至少唔會倒塌，唔會好似大陸咁有豆腐渣工程。」香港人聽到自由行一番話，即時辯駁。
自由行冷冷地回應：「嘿，你地香港宜家d樓起得咁快，咪又係大陸一早砌好，一車車送番黎香港到裝崁，大家都係用國貨，你話邊個比邊個強呢?」
香港人：「但我地有監督，仲有，係到透啖氣、飲啖水都安全d。」
「算把啦，大家都係飲東江水，不過你地比我地買貴幾倍姐；我地係大陸，全部人屋企都裝水機買水飲，邊個敢飲水喉水？不過你地真係慘，呢幾年新起既樓，由公屋到幾萬蚊呎豪宅，全部食水都含鉛超標，幾個小朋友驗出智力發展遲緩，咪好似我地當年的大頭奶粉咁。」自由行有感而發：「最搞笑係你地個特首，鉛水事件被踢爆頭幾日，咩都未驗，就推個水喉匠出黎，將所有鍋卸晒比佢，話咩焊接物含鉛，正常都應該驗埋條食水管啦，承辦商係中國建築，大家中國人，心照啦，你地個特首做戲做得太出面了。」
香港人自我安慰地說：「小朋友有咩事，起碼唔駛驚，係香港有得醫，唔似你地大陸，個人就死送到醫院，無人仔就唔同你醫。」
「你啱你啱，不過你地都唔好得幾多，個小學女生從高處墮下，腦漿嘔吐物一地，個d老師都無即時打999救個學生，反而叫人清理地上的嘔吐物，又話覺得個學生無咩野姐，好似訓著左咁。」自由行續道：「仲有，我一直以為你地香港的醫生可信，唔似大陸個d庸醫，見錢先救人，沙士個時你地有好多醫務人員為了救了人而犧牲；但宜家唔同了，利字當頭，名醫都唔可信啦，講野前言不對後語；學生湧入會議室，身為港大校務委員會委員的名醫，忽然跌低，當晚一見記者就話自己畀人踢咗一腳，令到人人怪責學生暴力，到第二日有片影到無人踢佢推佢，擺明係佢自己忽然跌低，就即刻改口風強調佢從來無話過有人推佢，咩到佢講晒啦，就當佢係舊患復發，忽然腳痛，但真係痛到要跌低，自然反應，面部都會表現痛苦啦，但個名醫眉到無皺一下，就咁跌落去，d戲真係差到呢。」
香港人對自由行對香港發生的事瞭如指掌，感到奇怪：「估唔到呢單野你都知！」
自由行頓時沾沾自喜，「一場黎到香港，當然開番個面書，多野睇到呢，有片有真相；你地d學生真係大膽，我地自從八九年個件事，學生都變成順民，大家努力讀書，都係為了搵更多的錢，盡快出國，理想公義就唔好提了，近日不知幾多維權律師被捉，就算佢地做既野，唔係為左自己，係為了保護社會弱勢，為了公義，但只要一反政府，就無好下場。」
香港人不服氣，作出最後的掙扎：「還好香港司法獨立，有咩野可以係法庭得到合理判決！」
「本來我都好羨慕你地香港的司法制度，不徇私、不枉法，唔會上面一個壓落黎，做成冤獄；舊年雨傘運動之後，你地d公安明明十個人一齊捉住個路人，掉過頭來話個路人襲警，上到法庭，個法官睇完證供，就知個d公安砌人生豬肉，」自由行搖搖頭:「但係個單胸部襲警判案，講真，我係大陸都未聽過咁荒謬的事，連北韓都未有咁既案例；我知你地唔鍾意我地大陸人落黎，話我地扯高鋪租，搞到成行成市金鋪藥房，小店執笠，又話我地走水貨，但呢d係你地政府政策出左問題，你地唔滿意，所以出黎示威，」自由行也為此嘆息:「但個女人真係慘，有片證明個女被你地一個公安推跌，推跌之後就被四五個公安，包括個個聲稱被胸襲的高級公安拉住，女的已經血流滿面，雙手被捉，都被個裁判官判佢用胸部襲警，被人查番，原來個裁判官今年退休，係到競逐緊中大校友評議會副主席一職；呢件事，就係話比你地生在香港的女仔知，有咩唔公義，都唔好參加示威了，到時個公安真係混水摸魚，拉埋暗角非禮你，反而你要坐監了，你地好似發生過警署強姦案，係香港生活真係好危險。」
香港人忽然想到一事：「你對香港發生的事咁清楚，都係因為香港有言論自由，有生果日報、有網媒姐！」
自由行：「呢樣係真，我唔駛翻牆就知道香港發生咩事，不過我有日經過便利店，見到你地大部份報紙頭條，似曾相識，一唸，就覺同大陸報d新聞真係似；你地個特首成日都話要成立創科局，表面係推廣科技，發展經濟，嘿，這技倆，我地大陸人一眼就睇穿，你地d網絡資訊太不受監管了，咩都講得，加上傳播速度又快，創科局成立的目的就係要管管這個太自由的網絡了，以言入罪，中國自古都有架啦。」
香港人聽到此，無言以對，如連司法與言論自由都失守了，香港便是真正與大陸的「一體化」了。
自由行看到香港人的反應，不忙加一句：「香港終於要回歸祖國了。」
香港人點頭：「係，歸西個歸.......」