嗰日同舊行家F食晏， 佢一坐低就投訴依家啲年青人缺乏誠信，唔顧大局云云。原來佢下屬越級向大老闆投訴，話F唔俾同事按向客戶服務嘅真實時間去入time card。
「填time card就梗係要睇個客有幾多fee去填㗎啦，點可以做咗幾多，就填咁多個鐘頭㗎！佢咁樣，去邊度都死啦!」F好勞氣咁講。
時間對於專業服務行業（如會計師、律師、工程師以及公關）嚟講就等於錢。所以呢啲行業通常要員工入time card， 等老闆可以知道員工啲時間用左喺邊。更重要嘅係睇下邊啲客戶over serve （即係無錢賺）；又或者邊啲客戶under serve （有機會個客覺得你serve得唔夠而去炒你）。不過好多時啲中層經理，一方面怕拒絕客戶額外嘅要求，另一方面又怕俾老闆話佢over serve個客， 於是就會叫啲同事填少啲鐘，甚至唔理做咗幾多嘢，都限制同事可以入嘅鐘數。 所以好多時明明返咗12個鐘頭工，填起time card果陣就發覺連八個鐘都填唔滿 。
無人想俾人「吹雞」（whistle-blow)，尤其係俾下屬篤出嚟，更加會感到深深不忿。不過問心，唔俾下屬講真話去反映真實情況又啱唔啱？日做十幾個鐘但只俾佢紀錄幾個鐘，對個下屬又係唔係公平？再者， 要員工填time card嘅目標就係希望公司可以更有效運用資源。如果亂填時間，公司又點可以知道應該喺邊度提升效率呢？
做嘢耐咗嘅人， 好多時已經慣咗有啲事就係唔公平， 所以成日覺得如果身邊嘅後生仔肯接受唔啱嘅事就係「成熟」嘅表現。問題係新一代年青人對不公義嘅敏感度甚高。如果上一代的中層經理們能夠尊重呢種敏感度，公司其實可以做得更好，更能面對唔同嘅市場環境 。只可惜眼見好多人管理人，只顧自己嘅面子，高高在上之餘又要自己啱哂，咁公司又或者世界點會有進步。