前幾日嘅世界盃外圍賽，被睇低嘅港隊又一次同中國隊賽和，港隊嘅表現又一次獲得大部分香港人嘅認同，但喺呢場港中大戰即將進行嘅前幾日，另一支港隊已經同另一支中國隊率先進行較量，講緊嘅係5人足球，港隊北上蒙古出戰2016年亞洲5人足球外圍賽(東亞區)，雖然同樣有港中對戰，但關注就少過11人隊多多聲喇，事關5人足球喺香港唔係咁普及，就算喺全世界黎講5人足球關注度亦不及11人足球，不過今次最少仲有少量香港網上媒體會對5人足球作出相關報導，香港5人足球隊唔再係WFC去WFC來，更有香港球迷為睇港隊特意註冊帳號及畀錢觀看由蒙古NTV電視台直播/錄播嘅5人足球賽事。
今次港隊去到蒙古遇著嚴冬天氣，各種氣候反應令球員作賽時極不適應，加上同中日韓有實力差距，最後5場輸晒出局，都冇計。而首戰對住東道主蒙古，唔少有關注今次賽事嘅球迷都認為呢場波港隊有得打，因為以往港隊都羸過蒙古，而蒙古5人足球喺亞洲亦冇乜成積，好似2012年個次亞洲5人足球外圍賽，港隊就憑黃俊霖、葉子俊及朱國良嘅入球擊敗蒙古，但今次蒙古就以8比3大勝港隊，戰果都令好多球迷感到驚訝，包括蒙古球迷，呢場波成為蒙古5人足球隊有史以黎贏得最多嘅賽事。
今次蒙古派出嘅5人足球隊球員部分都係11人足球嘅現役國腳及前國腳，包括踢緊烏蘭巴托大學嘅Norjmoogiin Tsedenbal及Tsedenbalyn Tümenjargal等，呢批11人足球現役國腳及前國腳本身全部都唔係職業球員，喺11人國家隊內表現都唔係太搶眼，但大波同細波玩法唔同，踢得掂大波未必踢得掂細波，踢得掂細波踢大波亦未必成功。
羸咗港隊後蒙古信心爆棚，5人足球亦難得成為蒙古體育頭條，但係實力同中日韓始終有段差距，不過都輸得唔算難睇，而對中國一仗時蒙古已經冇乜出線希望，亦吸引接近3,000名球迷入場，因為一部分蒙古人都十分憎恨中國人，所以呢場蒙中大戰就成為賽事最觸目焦點，球迷入場因素除咗蒙古人撐蒙古之外，仲帶有一種恩怨情仇關係，雖然自知實力唔夠，但蒙古球迷總會希望蒙古隊可以為蒙古人出返啖氣。