區選聽日就黎喇，沙打選區今年好熱鬧有4個人參選，1個就係沙打大佬民建聯嘅温和輝，另1個就係早幾年挑過温和輝機嘅沙頭角土砲曾玉安，另1個係坪輋土砲張貴財，最後1個係朱愛平。
温和輝喺單張政綱宣傳上主要以改善交通、支援老弱及房屋為主，比較主力喺沙頭角，但更多係宣揚自己過去偉績，一貫民建聯風格。而曾玉安、朱愛平嘅政綱都係咁上吓但相信亦係主力沙頭角，只係張貴財比較唔同，望改善沙頭角公路交通之餘仲有復興農業、活化村校、動物共融等被長期忽略嘅嘢。
呢一個星期進入最後直路，各候選人都盡最大努力拉票，好似最遲出黎掛banner嘅朱愛平就瘋狂爆Seed，每日企喺沙頭角公路同坪輋路交界最繁忙嘅地方拉票，雖然張貴財比佢早半個月咁做，但身高所限嘅朱愛平出動企紅膠凳大法，加上機械型式笑容及揮手動作成功搶盡居民嘅眼球，佢仲試過玩貨Van廣播加送Beyond名曲海闊天空，又係''今天我''，呢啲宣傳手法可能令某些居民感到煩厭，但總好過某些區玩老屈非禮扮死人冧樓，大家都知政綱你點講都得，但為咗票仔走去設計害人，咁就真係人比鬼可怕喇，睇區選仲驚嚇過睇鬼來電。
而政治傾向方面，雖然曾玉安、朱愛平報稱獨立，但查實都係親建個面，以往沙打選區都係親建派玩晒，今次最少多個張貴財你揀，雖然沙打多老人鐵票及圍頭勢力，正路温和輝跑出機會較大，但係張貴財嘅出現令以往一班因為唔想投親建而放棄區選嘅選民有一個選擇，雖然有選民同我分析過支持張貴財嘅人都係沙打選區以外嘅多，不過最少有一個非親建候選人出現可能會令到個選舉有啲唔同，係人都知張貴財係陪跑，但至少佢嘅參與可能令到成個選舉局勢唔同晒，加埋擁有唔少沙頭角人支持嘅曾玉安及爆Seed佬朱愛平，呢個鐵三角分分鐘割走温和輝唔少票。
我以往係唔會點理沙打區選，因為一向由親建獨玩，不如去睇多幾場低水平丙組波好過，但今次選舉係有史以來最激烈，一向多政治冷感嘅沙打區開始有啲變化，雖然喺相熟街坊口中有90%表示唔會理呢場選戰，但已經有進步，以前係99%的。