仲有一個星期，網絡廿三條就會喺立法會進行二讀。唔知點解上一次網民們好關心嘅事到左今日都好似冇乜風聲咁，可能大家仲未知、可能大家淨係理緊TSA、甚至可能大家覺得對自己冇乜影響。但如果網絡廿三條真係成通過嘅話，我夠膽講只要你會上網你就一定睇到個分別，你一定會後悔。
我怕我引用條文大家眼瞓，我就用最簡單嘅意思同大家講下網絡廿三條嘅影響。大家上開高登，阿寶樹熊圖依啲一定會見慣見熟，若果網絡廿三條通過左嘅話已後依啲圖就會受佢規管。你要貼又唔想犯法咩？得，麻煩係圖片上寫明出自咩戲／動畫、主角名、導演、年份、第幾集、最好連字幕係邊間電視台嘅你都同我搵埋出黎寫落去。當你寫完依一堆野再放張圖上去，阿寶我都望唔撚到啦，成幅圖除左字仲有乜撚野？咁你貼圖仲有咩意義？
唔好以為貼圖先會出事，改圖都一樣。你覺得飢餓遊戲好垃圾，想改張圖叫佢做垃圾遊戲，放劉江華落海報上面？唔好意思，警察上門拉你啦。點解？因為網絡廿三條囉。係啊，間公司冇告你啊，佢地連你改左圖都唔知啊，但因為網絡廿三條會將一切刑事化，刑事即係政府告你，就算版權持有者覺得「你改啦冇所謂」都好，政府要告你佢都吹唔漲。你話你改圖冇做商業用途，冇搵錢？你話你有自由？警察一句「你懷疑犯法，網絡廿三條啊」就可以拉你返去。特別係成日改民建聯圖笑柒班垃圾議員高官嘅各位，政府一定玩撚死你地。而成日上高登FB食花生睇改圖睇罵戰嘅各位，冇野你睇啊，你返屋企煲劇打飛機啦。不過容許我提下你，你覺得有邊部劇好睇，你覺得RUNNING MAN有邊個位好笑都好，唔好截圖喎，唔係啪一聲班警察又破門而入的你落臭格坐返三日。到時你唔好屌啊，我警告過你啦。
至於班離哂地嘅音樂人，你地以後唔洗為左樂器大小限制而同港鐵嘈啦！點解？你試下翻唱人地嘅歌丫，你試下放上YOUTUBE丫，你離地離撚到幾遠一樣比人拉返落黎告。告咩啊？網絡廿三條囉，你侵犯版權囉，理得你清唱定用木結他伴奏唱羅生門都好，理得你改撚埋歌詞叫埋隻歌做隨意門都好，只要曲果PART同人撞左你就係犯法。有冇諗過唱歌唱到有案底？冇諗過唔緊要，你再懶懶閒不問世事，好快你就會試到當中滋味。咁仲洗咩帶樂器返錄音室？返去做廢青啦。而果隊咩MR.我建議你地散BAND，你地好危險。
香港個個食神上身，有咩好食有咩唔好食都一定上網講一餐。但以後唔該你收埋，因為如果你嘅行為影響到人地收入一樣係網絡廿三條當中嘅罪狀之一。如果你再敢講譚仔係劣食，如果你再敢講大家樂隻雞脾圖文不符，你洗定個八月十五準備評論下監躉飯係咩滋味啦。仲上OPENRICE？學江澤民咁講，OPENRICE你執柒左佢啦！
網絡本身就係比大家發揮創意同批評時事嘅最好地方，而家乜都冇啦，第日乜都唔比做啦，結果香港仲有一大班人用WFC嘅態度去對依件事。醒下啦撚樣，就算你係CDROM，就算你冇創作過都好，你每日開電腦上唔上高登、上唔上FACEBOOK、上唔上YOUTUBE、煲唔煲戲同劇、搵唔搵好野食啊？網絡廿三條一實行，乜柒都冇得做啦，你唔洗旨意仲有人創作好野比你睇、你唔淺旨意搵到邊間餐廳係伏、更加唔洗旨意上網睇咸片有人分享粒SEED比你。你部電腦有乜用？冇嫁啦，玩ONLINE GAME啦。唔玩？屌，扔出街啦。上到網乜柒都冇得睇，乜撚都唔講得，之後政府做咩仆街野又會話網上冇人反對，民意一致支持，到時點搞你班撚樣都得。
你仲問我即係點？一係即刻企起身出黎反對，唔係就返印度食蕉啦，朋友！
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/