朱米高

傳媒人,基督徒,曼聯迷,識少少音樂 網誌

政經

「網絡廿三條」——唔同你講法例講common sense

「網絡廿三條」——唔同你講法例講common sense
廣告

廣告

如果你有個敗家仔,已經敗咗你大半份身家,今日再攤大隻手問你攞錢,你仲俾唔俾佢?

如果你有一個敗家政府,十幾年來一手敗走自己嘅公信力,仲越來越揮霍無度咁濫用權力,今日佢再攤大手問你攞多D權力,你仲肯唔肯俾佢呢?

當然,唔係絕對無得傾嘅。敗家仔如果肯付出少少誠意,同老豆好好解釋:今次點解要駛咁多錢,點樣保證唔會再亂駛錢,做老豆或者都可以信多佢一次。

不過,政府就無咁嘅誠意,連門面功夫都懶得做,可能因為夠票通過所以乜嘢都慳返,夠膽講通過咗先慢慢修改,推銷技巧停留喺十幾年前討論基本法廿三條時「你放長雙眼睇」嘅低劣水平;等如老豆提議敗家仔寫借據,敗家仔話我收到CASH先慢慢諗下點寫一樣。

網民市民猛話唔清楚點先可以獲得豁免,政府就猛話唔係喎好清楚吖無咩問題喎,由一個咁有問題嘅政府口中講無問題先至係最大嘅問題,市民大眾作為被管制嘅一方,有咩攪唔清楚真係隨時監都有得坐,點可能唔擔心?

政府要通過「網絡廿三條」的確夠票,拉布講真都係權宜之計,唔好幻想拉布本身可以迫到政府投降,但大家要好好善用拉布所拖延出嚟嘅時間,多尐表達反對,向多D人解釋新例嘅魔鬼細節,最緊要嘅,將反對嘅聲音集結成實際力量。零三年嘅廿三條立法同一二年嘅國民教育,兩次政府都肯定夠票(國教根本唔駛立法會通過),最後都因為強大嘅群眾力量而暫時拉倒,所以幾渺茫都好都唔好放棄。大家仲記唔記得幾個星期前,有球波明明好似射入咗都俾「英雄輝」救返出嚟,如果因為個波入梗就唔試下救,香港人配唔上「香港勁揪」呢句口號囉。

廣告