立即捐款

政經

教會犯眾憎,搞著報佳音

教會犯眾憎,搞著報佳音
廣告

廣告

文:陳可樂,馬鏸欣,高仲禮

在網上流傳一張相,一群基督徒喺平安夜於油麻地天后廟外舉行報佳音活動。從相片可見,一群約三十人的基督徒穿上詩班袍在廟的圍牆前聚集,而在該牆上掛咗一塊寫有「聖誕報佳音」嘅橫額。

網民的反應十分一面倒咁認為基督徒十分不尊重其他宗教。有人認為咁係屬於「挑機」,也有人反問點解基督徒唔去清真寺。

講到底,今次呢間教會比人責罵,根本原因係香港基督教己經無哂形象,衰到貼地:對民主唔支持,立場唔單止保守仲好建制。

廟宇前地作為公共空間?

中國式的廟宇,廟前嘅空地一般為社區空間,供結社用途。例如1966年蘇守忠反對天星小輪加價的運動,就係喺天后廟外集會。平日,街坊都會聚喺廟前做運動,吹水,捉棋等等。教會喺到唱下歌,其實同啲街坊運用個空間都無咩分別。

另外,當晚天后廟於六點關門,理論上無阻礙善男信女祈福。報佳音嘅團隊將橫額掛喺廟嘅外牆,係其中一個可議之處。如果間廟話唔俾而佢哋夾硬咁做,就真係有問題。但係,今次都睇得出,間廟可能仲大方過啲建制教會,因為福臨教會恆常咁掛「耶穌是主」橫額咁多年,天后廟都唔當一回事。(當然,如天后廟個邊唔比人喺佢哋外牆掛橫額,咁就同教會一樣咁小器囉)

所以,基督教嘅教牧應該向天后廟學下嘢啦!應該將宗教場所變成公共空間。例如,教會嘅負責人都應該要開放自己教堂外牆比人掛吓Banner,佔領嗰陣教會開放會址比佔領者,就係實踐呢樣野。任何人都應該去用吓呢啲公共空間,而唔係只有呢間教會用。

耶穌在廟街—脈絡介紹

有唔少網民會問點解要喺間廟而唔喺清真寺出面報佳音。呢一個不解係源於對事件脈絡嘅唔認識。福臨教會同天后廟,喺廟街已經共存咗好耐,其實一直都無咩爭議。

福臨教會之所以會講「耶穌在廟街」,係因為創會牧師黎振滿八十年代喺油麻地宣教時,睇到呢個社區聚集咗好多弱勢社群(新移民、露宿者、妓女、老人), 於是產生咗要喺廟街建立教會,服侍當中弱勢人士嘅諗法。佢哋目前嘅事工包括向露宿者派飯、社區探訪等。

筆者參加過福臨教會嘅聚會同佈道會。呢間教會逢雙月份嘅第一個禮拜五就會喺榕樹頭公園搞佈道會。其中一個佈道工具就係福音解籤!即係將聖經故事變成籤文,喺天后廟外擺檔俾人求籤,仲有教友做廟祝幫你解籤添!平心而論其實都不失為有創意嘅跨宗教交流嘗試。有網民話下次要去教會求籤,其實呢間教會一早有咁嘅服務,大家不妨去參加下。

為何基督教犯眾憎?

講到底,香港主流基督教犯眾憎都係因為,一)排他同埋對其他宗教唔尊重,二)對不公義不聞不問,協助維穩,三)打壓性小眾權益。

例如教會唔俾信徒上香,仲會叫佢哋說服家人拆土地公,有啲基督徒仲話要幫黃大仙區改名,真係痴痴哋線。所以,呢啲就係真正唔尊重其他宗教。

基督教維穩,對社會公義不聞不問更係死罪。播道會嘅牧師被指喺講道時叫人投建制派。大主教鄺保羅為政權服務,示威者比人無理對待仲叫人下次帶埋工人去遊行。

對於性小眾不停打壓,明光社、恩福堂之流耗用社會大量嘅資源去宣揚愚民兼恐同嘅訊息,動員會眾去反對性傾向歧視立法咨詢,又用六個一嘅保守家庭論述單單打打等等,對性小眾嘅壓迫實在如恆河沙數,相信大家對呢啲嘢都好清楚。主流基督教,犯眾憎,就係咁解。

如果本地基督教會唔認真處理上述問題,則只會令教徒動輒得咎,連累無辜。

挑機唔係重點

網民嘅討論主要圍繞喺教會嘅意圖,而不滿嘅主要原因係覺得間教會喺度挑機,唔尊重其他信仰。

但挑機與否並唔係重點,一嚟間教會嘅意圖係無辦法證實或者證偽 ; 二嚟,挑機作為一種公共討論,喺容許多元價值嘅社會,係值得鼓勵嘅。有越多嘅論述,就越能夠推進社會嘅發展。如果有任何人唔認同呢種論述,大可以自己提出另一種論述同佢分庭抗禮。就好似大家去Tree Gun度唱喜喜洋洋咁,只要係公共空間大家開心share用。所以下次有建制教會講埋哂啲奇怪嘢,歡迎大家去佢地門口空地到集會唱《鼠能夠》,或者係派下支持同志平權嘅傳單。

跨宗教交流先係出路

有網民話要去教會出面念佛經,又或者去讀可蘭經,其實真係可以做。嗱,無錯啦,宗教間就應該有多啲交流同對話,而唔係得呢間教會單向咁表達基督教信息。

不論係教會、清真寺、錫克廟、定佛教廟宇,只要佢地前面係公共空間就可以用。公共空間嘅原意就係要俾唔同嘅人用。喺教會外邊查佛經,又或者喺天后廟出面佈道,唔單單係一種跨宗教交流,亦都體現出社會嘅多元。

報佳音?邊忽佳呀,睇過?

的確,報佳音令人反感,係因為段佳音同我哋嘅生活經驗無關。喺度唱詩歌慶祝節日,霸咗啲地方唔知對個社會有咩用。香港人愁緊普選、東北、網絡廿三條嗰陣,啲教徒就係度唱歌話平安喜樂,真係勁諷刺囉。唔怪得咁多香港人聽到耶穌愛你,好似聽到粗口咁。

不過,如果教會喺油麻地霸個公共空間,唔係喺度唱主能夠,而係唱《拉朱經緯》,叫人反對警權過大。或者係叫人反對網絡廿三條,維護言論自由。或者係叫人幫下露宿者,叫政府唔好掛住用政策幫大有錢佬。大家會唔會覺得呢啲佳音,先至係我哋想聽﹖

上帝用受壓迫者、貧窮人嘅身份到世界上,其實就係要去解放啲俾制度壓迫嘅人,例如日日面對政府壓迫嘅港人。報佳音,應該係要講呢啲。

廣告