題為編輯所擬。
睇住毛記電視呢班「膠人」，我諗起另一班「膠人」，The Plastic People of the Universe，捷克斯洛伐克70年代出現既一隊band。原本無乜野，佢地只係覺得一黨專政高壓下既布拉格，無乜歌好聽，想試下專心做好音樂。結果好多人想湧去睇佢地。於是政府就唔鐘意了，佢地唔特別講政治，都開始被捉被拉，要在地下先可以繼續玩音樂。有人睇唔過眼，見佢地無做過乜，都要被拉，就開始抗議，一輪抗議後，呢班人寫左份「七七憲章」，講保護人權，講表達自由。後來當然仲發生左好多事，但少左其中一樣野，可能就唔會有1989年天鵝絨革命，捷克民主化。
唔好睇少文化，唔好睇少各種各樣、各種程度既反抗者，唔好睇少唔甘心社會氣氛窒息而挑戰常識既創作人。你唔知道邊一刻，當權者會連少少野都接受唔到。要令當權者知道，愚民，唔係咁容易，因為會有人挑戰你。要河國榮同MC仁一齊在台上唱 'I rap the police, I rap the government'，要在台上大叫「失蹤既自己舉手」，還要電視台直播要有大公司sponsor，一定要好多人撐住。唔容易。
河國榮話，唔試就一定唔得。The Plastic People of the Universe被警察拉時，撐佢既哈維爾（後來既捷克總統）話，總之一齊唔肯同當權者同建制陪笑，唔虛虛假假咁樣生活，無權既人就有權力。香港人，一齊跟住毛記電視咁，同當權者講，笑你就係笑你，吋你就係吋你！我地未必會有好似Plastic People of the Universe咁樣既地下文化，但無人知道，他日睇返香港歷史，100毛會唔會一個唔覺意就係呢個城市既「膠人」，開始左一場唔向現實屈服既運動。搞頒獎禮聽音樂唔屈服，就可以每個環節都唔屈服！