文：張在森@路邊政策組
蒼天已死，黃天當立！
無記已死，毛記當立！
毛記分獎禮嘅成功同瘋狂洗版為愁爆嘅真·香港人帶嚟一個Happy Monday，一個香港人久違嘅happy moment，喺呢度，多謝毛記電視！
當一個傳媒能夠掌握社會嘅脈搏，同受眾一齊呼吸，同喜同悲，除咗贏得收視/點擊率，無形中亦會建構/加強一個族群嘅文化意識/身份認同。上世紀八、九十年代嘅TVB，喺呢方面貢獻良多。今時今日，無記無心無力，尤其染紅易幟易主之後，更加係嘥氣。一個機構係一個整體，就好似人一樣唔可以割裂嚟睇，即使你係有心人以為可以暗渡陳倉，做得再好，不過係協助洗腦，為政權塗脂抹粉，因為去到大是大非關鍵時刻有人會刪走「拳打腳踢」幾個字，會將那星引述老朋友嘅流料詳細報道，如果本質係鴉片係毒藥做得再靚仔都不過係將D鴉片搞好個package 。講到洗腦，喺共黨眼中傳媒係意識型態嘅工具，唔係點解要買起曬全港嘅傳媒點解唔批個牌俾港視。
我話「呢個係一個冇大台嘅時代」，因為大台已被收編，大台不可信。
我話「無記已死，毛記當立」，指嘅係作為傳媒嘅生命力同影響力，講嘅係強度，唔係規模，點講都好毛記亦難成氣候。
不過，講開規模，今時今日，咁嘅政治環境，做傳媒又好，做咩都好，我認為只適宜打游擊戰，應該奉行E F Schumacher 所講"Small is Beautiful"嘅原則。
好似講緊傳媒生態，其實其他方面都可以apply。求其闔埋眼我諗起嘅係離開唱片公司獨立運作嘅HOCC同埋佢嘅18種香港、區選中剷起葛根嘅葉榮同徐子見、傘運催生嘅社區關注組同公民社會組織⋯
冇錯，呢個係一個冇大台嘅時代，呢個仲係大衛打低巨人哥利亞嘅時代，只要真.香港人堅守陣地，仗～笨唔係冇得打嘅！