立即捐款

生活

對勁曲金曲分獎典禮想說的話

對勁曲金曲分獎典禮想說的話
廣告

廣告

從大約廿幾期開始睇100毛,到後來睇毛記電視,當然有睇勁曲金榜!(其他東西其實都好值得寫,另文再提)其實呢件事好難做,個個星期有榜,個個星期改幾首,仲要緊貼時事社會,所以偶爾有好笑有好爆作品,同時又搵來估你唔到既人去演唱,慢慢成為好多人個個星期一定要睇既「電視節目」,係,電視節目,因為現時那個電視台的目標觀眾群是五十歲的,雖然,勁曲金曲,即係當年歡樂今宵。

當上次於HOCC演唱會玩季選坊間已經大嗌不如攪總選,結果攪成,唔止攪成,仲要全港哄動,哄動程度係:身邊好多人為左撲飛好頭痕,門票極速無晒,贊助商門票又極速無晒;開波前不足一星期竟然話有電視直播,好多(真係好多)香港人興奮過過年,約埋Book K房睇,聚埋上街睇,而我,好好彩有得入場睇。

在場館外目測不少等候入場的都是七八十後,穿西裝的上班族有不少,大家的確未入場先興奮,乖乖排隊。現場有TVMOSTBUDDY可以與人合照,排隊條人龍都非常唔講得少,而排隊買書買紀念品亦大有人在。入到場,大電視不斷播放兩首二次創作廣告歌,的確令大家更期待,結果大家得到的兩個多小時,有笑有叫有驚喜有喪拍掌有大合照有眼濕濕。

多謝毛記電視

整晚的製作很認真,認真在於,現時四台越來越不堪入目的幾個頒獎禮可能連Full Band都無,Dancers更不一定有。這晚,竟然有開場的勁歌熱舞絕對不hae,幾位偽人落力跳埋一份,而且整體工作分配係絕對有諗過每個偽人既形象與能力,成件事絕不失禮,甚至一比近年叱吒頒十大既DJ與及港台既主持,完全超班--人讀稿你讀稿,點解差咁遠?

至於賽果,姑勿論毛記無能力邀請更多歌星藝人出現(特別當知道有電視直播肯定有人唔方便去)還是毛記滿足於現有卡士然後再度成件事,整個賽果與編排要驚喜有驚喜,要感動有感動。其實除左自己人,何韻詩王宗堯方健儀葉韻儀河國榮都係意料之內,張氏兄弟算第一次出現不過不能製造大驚喜,鵬哥出場係廣告關係,咁十大賽果其餘獎項如何頒得好玩又好睇,節目製作果真交出一份合格有餘開心到爆既功課,當然,偽人們訓身精彩演出,絕對要讚賞。

多謝觀眾(包括我自己)

全場觀眾之投入與興奮是絕對估你唔到:唔駛主持嗌「俾D反應啦/俾D掌聲歡呼聲」大家自動波仲毫無保留,全晚接近八成半表演在場觀眾有拍手和應,仲有好幾隻歌有唔少人開手電閃光燈揮手製造氣氛。觀眾投入成咁當然大家真係好支持件事,而成晚係由未開騷播廣告歌,開騷前將場館廣東國語英語呼籲都玩埋一份,電視直播廣告期間醒正野俾現場觀眾等等以至成個節目都毫無冷場,所以,實興奮!

另外我發現,在場有部份觀眾應該完全無聽過呢堆歌,佢地第一次聽仲有埋歌詞實好似發現新大陸咁高興;至於我地呢類呢?製作方面填全首詞(比起之前每次出現都係半首)與及部份有趣既動畫都係驚喜所在:淨係羅生門的神果部份已經笑到眼水都標埋啦!

多謝Shell與Now

我諗呢個騷都可算係非常異數地全場觀眾對於歌手主持成日多謝贊助商拍手叫好仲叫埋一份,無他,大家覺得Shell呢舖實在勇,當然,成件事真係非常有教學價值,我亦相信Shell相關職員搏呢舖而贏開巷係非常興奮--所以上台代表囉獎果位眼泛淚光。Shell除左贊助呢件事好野之外,佢地連傳統宣傳模式都唔跟而聽毛記支笛亦係好野--十個著九個贊助商有票在手,肯定攪抽獎務求谷生意,而今次竟然係用兩次失驚無神突然網上公佈某某油站有限量名額買滿幾錢油券就有票,而毛記連黑面老細都落油站造勢,成件事反傳統而Shell真係海報宣傳都唔駛做,贏晒!都仲未計呢份勇氣換來有人覺得佢正而有情有義幫襯,你估一個hashtag真係唔值錢?

至於Now,其實無線肯定唔播,亞視無錢播,HKTV呢期亦唔會用錢係呢件事,有線連個免費台幾時成事都唔知,若果Now唔攪就應該無乜機會。呢件事絕對互相利用:Now今次為之後Viu打頭炮,同時極短時間內決定直播都有幾個廣告商,而且應該多左唔少人裝。Richard哥從來都不按牌理出牌,呢舖,贏左!

後事如何

主觀願望當然希望繼續有得攪,因為今次實在贏盡掌聲,不過要留意既係,原來所有歌詞都係三個人(包括黑面腦細)主理,當晚有新出現歌曲的確唔係好好笑,如何提昇二次創作歌詞水準應該係毛記要好好面對既問題。另外,點樣吸引更多藝人願意同你玩又係難題:棒打出頭鳥,你家陣咁爆個勢咁勁,唔好話方丈份人小器咁簡單,有關唔知邊度人士都會俾壓力藝人。現時藝人與毛記關係,想合作既可以拍封面配合商品電影做專訪,要玩野同你唱歌要再考慮,仲話要表演埋就有更多考慮。當晚有人係咪真係病,有人係咪真係唔得閒呢?

最後,當然有關版權修定條例:若果通過,肯定無玩得咁張揚與過癮。

能夠係交稅前來一個大歡喜之夜真係非常正,所以,每年最好都有--大家都可預計,每年交稅俾呢個政府,真係好很嘔血。

原文刊在此
三十過後一個人住 Facebook 專頁

廣告