我認識一位仁兄多年，佢是一個好執著，好堅守自己信念的人，每次和佢認真討論，都拗到天昏地暗，無邊次有共識。
立場和想法雖不同，但我其實相當敬重佢，只是無講出口。據我了解，在佢大學畢業的時代，要找一個中學老師來當並不困難，以佢既條件，更加不成問題。但佢偏偏選擇投身社運，在民間團體打滾，為弱勢爭取權益。要知道，當時走呢條路相當冷門，唔單止賺錢唔多，仲唔可以呃like, 享受果種被萬人推許的虛榮。佢仲在FB透露過，佢的選擇一直得唔到至親的諒解和支持。眼見唔少走主流路徑的同學安安穩穩咁過中產生活，佢所追求的理想社會依然遙不可及，我相信佢唔會太好受，但佢至今仍未肯放棄。在佢身上，我見到堅持信念不是一句扮型的口號。
所以，有評論用社運產業鏈來嘲諷投身呢門事業的人，好似做生意咁圍威喂好好搵，是一種相當昧於現實的刻薄說話。或者時代唔同左，年青人政治熱情高漲，搞網媒有市場，社運真係有機會可以當一門生意(或宗教)咁經營，但咁亦只係表示用社運產業鏈去議論的人本身有食呢舊肥豬肉的意圖，對一批在呢個行頭寂寂無名打拼多年的朋友來說，咁講係一種老屈，是對佢地人格的一種侮辱。呢D一心想食大茶飯的人應該未聽過，做NGO (非政府組織)者有一個自嘲的講法，佢地話要成立NGO的NGO來替行家爭取權益。因為，NGO一般資源少(果D中產NGO另計)，工作量大，三頭六臂都做唔掂，隨時捱壞身子。結果，令到為弱勢爭權益的人本身的權益最唔受保障，只好搵專門的NGO替佢地出頭云云。
因為我唔係做NGO，亦唔算捱得辛苦的人，我無法完全代入我果D朋友的處境諗佢地既難處。我只是希望果D開口埋口話自己有幾本土的勇武人士，唔好咁容易就抹煞別人為理想而付出的努力和汗水。