我明部戲上左好耐，但為左令仲有小部份想睇而又未睇嘅人，我盡量唔劇透。盡量啦下。
你話部戲係咪真係咁好笑？我覺得又未到令你可以笑到肚痛果種地步。但死侍果種風格，果種人性化喺冇一個英雄可以比得上佢－－可能IRON MAN都唔似英雄格，但佢身份同身家都太誇張，極其量係一個有錢人屎忽痕想出位咁樣，我投入唔到，又或者應該講佢係一個好明顯嘅電影式英雄。
我再用用美國隊長做例子。佢喺大家心目中正義嘅化身：為國家、為人民、為正義而戰，做事光明磊落，喺果種見到啊婆過馬路一定會扶，有人搶嘢一定會幫手捉然後交比警察果種乖乖仔式英雄。依種英雄可以喺人民心靈救星，可以喺有驚天大奸角出現果陣挺身而出捨命戰鬥嘅人，但如果對方係小人，係腐敗嘅政府，甚至係一個位心不良但又唔係大壞蛋嘅市民的話，以社會「正義標準」做人嘅美國隊長應該會喺進退兩難，打又唔係唔打又唔係，最後就咁比人捉到果隻。
但死侍明顯喺無視所為正義嘅法則：佢會為左自己嘅目的毫不留手殺哂所有對方嘅手下，佢同樣會為左自己所愛而付出一切。你可以喺死侍身上睇到好多同其它英雄唔同嘅地方，你可以見到就算係X特工嘅正義英雄Colossus都會覺得死侍做事太過火，經常同佢講「做英雄應該要點點點」。但死侍一於少理，粗口照講，仇人照殺，而且仲會對住Colossus舉中指，叫佢收嗲。你話佢好粗俗咩？但佢私下又的確只接殺衰人嘅JOB，佢又的確會同班英雄合作對付壞人，只喺佢唔鍾意跟班正義英雄嘅規舉，所以造就咗佢自己嘅風格。點解正義就一定要毫無缺點？點解正義就一定要事事完美？一個心地善良嘅人一樣可以講粗口，一個會救弱者嘅人一樣可以心狠手辣，一個正義英雄一樣可以大搞男女關係，淫賤不能移（嗱，部戲冇講依方面）。
死侍喺只重結果不重過程嘅英雄，佢唔介意為達到目的而幾殘忍幾唔符合正義英雄嘅形像，佢唔介意比所謂嘅同道中人覺得佢太過份太暴力，佢更加唔會同你和理非非講大道理。佢的確唔可以討到大部份人歡心，佢出到街冇可能好似美國隊長咁受萬人景仰，但喺為左要達到大家口中嘅正義，其實死侍依種睇落唔受控制，離經叛道嘅人喺不可缺少。單靠一班淨係識講和平講大義嘅人只可以對抗到人所共知嘅邪惡，但對腐敗仲有暗藏嘅殺機佢地都無能為力，因為佢地會受制於人民，只要大眾唔覺得真喺咁衰，只要大眾唔認同你亂咁用暴力，一班自稱正義嘅人就會綁手綁腳。喺依種時候就只有靠死侍背負住大家嘅厭惡，用大家唔建議，覺得唔理性嘅方法去解決問題。佢唔需要光環，因為佢要嘅喺結果而唔喺名聲，但佢為正義所付出嘅，其實可以比其它任何英雄更多。
嗱，我依篇嘢淨喺講電影講死侍，我冇影射邊度，亦冇影射邊個。不過如果香港真喺可以有一個英雄，我想要嘅就喺死侍。今次唔需要十二發子彈，只需要其中果粒六號就可以。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/