圖片：蘋果日報
講起愉園，我會諗起中學生涯成日睇嘅愉園大戰晨曦；
同時亦會諗起我偶像－前香港首席門將范俊業；
亦會諗起其他愉園嘅球員，例如落後時會變前鋒嘅卓卓、場均入一球嘅巴西射手奧利韋拉、射破巴西大門嘅李思明、「肥仔嘜」馬斯奧，仲有其他都老臣子，「雞仔」郭裕洪、「細焯」潘耀焯、「港版碧咸」潘文迪、「香港隊長」李偉文等等，每一位，都係學生時代嘅回憶；
但講到最深刻嗰一位，始終係佢－「豪豬」蔣世豪。
你問我鍾意佢啲乜，我答唔到你，可能因為我個名同樣有個「豪」字，加上又係着我鍾意嘅「8」號波衫，再加上個人風格同球味，所以特別喜歡呢位技術出眾嘅左腳中場指揮官。
我對佢嘅認識只係好表面，過去聽過唔少佢嘅威水史，當中最多人提及，係佢開賽3秒就入波嘅世界紀錄。以前成日都朋友提起都會諗，究竟點樣做到呢個3秒入波紀錄？
但更多人討論嘅係，一個屬天才橫溢嘅足球員，卻生錯於香港足球嘅黑暗時期。港隊成績不佳係一個問題，但更大問題係康文署對港隊嘅無視，令本來視代表港隊係榮譽嘅豪豬，顯得心灰意冷，最終黯然退出港隊，此乃「城門谷事件」。一年後，豪豬亦宣布退役，當時佢只有33歲。
5年前嘅今日（4月22日），豪豬從天水圍寓所一躍而下，就咁無聲無色地離開咗我哋。當日，各報章嘅頭版都係講呢件事，冇一位香港球迷接受到呢個消息。有傳，蔣世豪財困一時諗唔開，亦有傳難捨恩師黎新祥逝世而情緒低落，更有傳只係醉酒墮樓，但無論咩原因都好，豪豬逝世嘅事實，點都改變唔到....
時日太快，昔日爭標勁旅愉園早已轉戰乙組，甚至來季好大機會要降到丙組；當日愉園一班球員，亦早已有各自新嘅一頁，惟獨豪豬一人，永遠停留在35歲這個階段........
5年了，不知你在那邊的生活好嗎？
ps：在高登看見關於豪豬的post，因而觸發思緒。