立即捐款

Momay

我係熱愛足球嘅油漆佬。 網誌

國際

親友手信——印尼電影《回看98》

親友手信——印尼電影《回看98》
廣告

廣告

印尼親友來港帶咗份手信畀我,唔係啲老土嘢,係2015年喺印尼上映嘅電影《Di Balik 98》DVD一隻,可能佢聽我提過,真識做,雖然佢係非法BT再燒出嚟。

由於呢部電影冇發行去海外,所以喺香港市面上係搵唔到任何影碟,即使係兼賣印尼電影VCD、DVD嘅極少數印尼商店都唔會入貨,因為呢部並非常見嘅主流商業娛樂電影,係一部涉及印尼政治嘅電影,話題比較敏感,接近非主流口味。

上年單睇個預告已經好想睇,不過尋晚足本睇晒後發覺同想像有好大差距。先講講個故事講乜先。

《Di Balik 98》中文翻譯就可以叫《回看98》,印尼中文媒體多數叫《回顧98》,98年對印尼嚟講係一個重要嘅年份,如果你喺討論區睇過一篇附血腥圖片嘅印尼排華文章,你應該估到呢部電影大約係講啲乜,當然部電影唔係只集中講暴亂事件。

當年亞洲金融危機肆虐,印尼盾又貶值,平民生活非常艱苦,加上總統蘇哈托政權腐敗無能及長時間極權統治引發導火線,一班關心社會,就讀雅加達Universitas Trisakti嘅大學生眼見國家就在水深火熱之際決定發起示威要求政府改革及要求蘇哈托落台,最初係示威以和平方式進行,當加入嘅平民愈來愈多,場面開始失控。

5月12日軍警向大學生及平民開槍鎮壓,有4位大學生死亡,暴亂亦隨即發生,印尼雅加達進入無政府狀態,華人慘成羔羊,最終蘇哈托難逃壓力下台,結束32年獨裁統治。

《回看98》就係以呢個真實背景為主題,故事圍饒兩位男女主角,包括係Universitas Trisakti女大學生Diana(Chelsea Islan飾演)及佢嘅同學兼男朋友Daniel(Boy William飾演),Diana係爪哇人,而Daniel就係華人,雖然大家膚色種族及宗教唔同但感情非常好,大家都係熱愛國家關心政治嘅學運分子,大家都參與咗喺雅加達嘅示威運動。

Diana嘅姐姐Salma(Ririn Ekawati飾演)於總統府餐廳打工因此嫁咗畀一位印尼軍官Bagus(Donny Alamsyah飾演),隨住局勢緊張,Bagus被多次調去前線執行任務,因此Bagus經常與Diana碰面,本來大家感情要好,但去到呢個位雙方嘅立場不一,Bagus認為Diana應該努力讀書貢獻國家,唔應該走上街頭做危害國家嘅事,而Diana就認為Bagus咁做係助長腐敗政權毒害國家。

去到1998年5月12日,警察及軍隊突然向示威者開槍導致四名大學生死亡,示威者紛紛走避,暴亂亦隨即爆發,暴徒有組織地焚燒搶掠華人商店,Salma四出尋找參與運動嘅妹妹,但途經華人街卻發現所有商店被燒被搶,更有暴徒當街強姦華人,Salma想上前阻止卻突然腹痛難忍暈倒路邊。

鏡頭一轉本身係華人嘅Daniel趕返屋企時發現屋企已被洗劫,家人亦失蹤,暴徒只於牆上留下一句「趕走支那」嘅標語。後來暴徒發現Daniel正想將佢殺死之際被一位好心流浪漢救咗,Daniel亦搵到佢家人,大家決定離開印尼。而總統蘇哈托嘗試重組內閣但已失去其他政要嘅信任,同時示威群眾成功佔據國會大廈,5月20日蘇哈托宣佈下台,學生及平民都非常開心,不過Salma同Bagus嘅BB就冇咗。

十幾年後Daniel重返印尼雅加達,亦搵到當年嘅愛人Diana,但Diana婚已結,因為一場暴亂,就咁拆散一對情侶,部電影去到呢個時候就完喇。

同我想像究竟有幾大差距?我未睇前自以為係一部批判味好重嘅電影,但確係我幻想太多。電影只不過係將98年嘅事簡單、快速地回顧一次,冇去詳細描述事件起因亦冇去針對某方,何解統治者要轉移人民視線將矛頭指向華人?何解軍警冇出現維持秩序?電影入面你係搵唔到呢啲嘢。

或者同部電影個名一樣,只係將件事回顧一次,重點係唔希望現時嘅人遺忘呢段史,至於當中較深入嘅問題就要留返想知嘅觀眾自已去發挖。

廣告