最近讀了一則新聞，台灣宜蘭縣政府通過「寵物管理自治條例」，規定寵主在飼養寵物前必須先上2小時講課，學習當地的動物保護法例、飼養動物及動物福利等知識，如無故「走堂」，會被罰款。
我想起香港，動物買賣的情況有多壞？買動物的人又有多無知？養動物的人有多不負責任？以下是我在診所一個小時內接聽到的幾個電話，全部真實，沒有刪減。
（一）
客人：「我想幫我隻狗狗book 時間打預防針。」
診所：「狗仔幾大呀？」
客人：「兩個月。」
診所：「ok，咁要打第一支針……」
客人：「唔係呀，打第二支啦！」
診所：「得兩個月，點會打第二支？」
客人：「寵物店話出世冇耐就打左一支針，我買既時候係見佢話打左針先買架！」
診所：「sorry，寵物店係唔可以打針既，而且動物在八個星期前係唔適宜打針既！就算佢真係打左，唔單止冇效，仲對體弱既bb做成危險。」
客人：「下？係咩？？咁點呀？？」………
（二）
客人：「我想幫我隻貓貓book 時間打預防針。」
診所：「貓仔幾大呀？」
客人：「歲幾啦大概。」
診所：「咁要打一年一次既加強針係咪？有冇之前針卡紀錄？」
客人：「冇針卡呀！咩針卡？」
診所：「咁你之前帶貓貓去邊度打針？」
客人：「我冇打呀，買既時候佢地話齊針！」
診所：「邊個佢地？」
客人：「網上賣貓d人囉！」
診所：「佢地講你就信？？」………
（三）
客人：「你地醫生會唔會寫證明書架？」
診所：「請問咩證明書呢？」
客人：「我係網上買左隻poodle，養左幾個月，發覺佢跛下跛下，想搵醫生寫個證明，我拿去換。」
診所：「換咩呀？」
客人：「換過第二隻囉！」
診所：「唔使換啦，私人繁殖點換都係一樣架！」
客人：「咁拿去退錢都好！」
診所：「咁你有冇諗過隻poodle俾你退左之後會點？」……
類似這樣的電話其實每日每小時都有，氣死人不賠命！我知道有一間獸醫診所為了懲罰這些不負責任的主人，堅持拒絕為那些從私人繁殖得來的動物應診。我當然認為這是很勇敢很有骨氣的做法。但想清楚，其實又好像沒有懲罰主人，只是懲罰了動物。
我明白有求就有供，這是自由市場。但自由市場也要有道德的考量及規範的。政府更有責任去規管，甚至打擊那些破壞了社會核心價值的所謂自由市場。香港的動物買賣已去到了唯利是圖、出賣良知的失控境地，而政府竟然還想放寬動物買賣的銷售條例（139b），無限量的向動物私人繁殖者發牌，容許參予者在私人住宅繁殖動物並出售。後果是：香港變成一個寵物業很發達的寵物繁殖港，一樓一狗的寵物之都。培育出一班一時衝動，當寵物是玩具的無知主人。而最後犧牲的，只有…………動物。
***四月三十日，4.30台、港、澳動保大遊行！取締私人繁殖，邁向動物零買賣！